Interpol Bosh kotibiyati ekspertlari BOMCA 11 loyihasi doirasida Interpolning Oʻzbekiston Respublikasidagi Milliy markaziy byurosiga tashrif buyurdi
2026-06-08 19:30:00 / Yangiliklar
Joriy yilning 1-3-iyun kunlari Yevropa Ittifoqining moliyaviy koʻmagida amalga oshirilayotgan BOMCA 11 loyihasi doirasida Interpol Xalqaro jinoiy politsiya tashkiloti Bosh kotibiyati ekspertlarining Oʻzbekiston Respublikasi IIV Interpol Milliy markaziy byurosiga tanishuv tashrifi boʻlib oʻtdi.
Tashrif davomida Oʻzbekiston Respublikasi Ichki ishlar vazirligining tegishli boʻlinmalari vakillari ishtirokida tezkor axborot almashish mexanizmlarini takomillashtirish hamda Interpolning I-24/7 axborot resurslari va kommunikatsiya tizimidan foydalanish imkoniyatlarini kengaytirish orqali xalqaro politsiya hamkorligini yanada rivojlantirish masalalari boʻyicha bir qator ishchi uchrashuvlar oʻtkazildi.
Axborot-texnologiya infratuzilmasini modernizatsiya qilish, axborot xavfsizligini mustahkamlash, shuningdek, milliy huquq-tartibot idoralarining Interpol vositalari va maʼlumotlar bazalariga kirish imkoniyatlarini kengaytirish istiqbollariga alohida eʼtibor qaratildi.
Tashrif dasturi doirasida Markaziy Osiyo davlatlari huquqni muhofaza qilish idoralarining transmilliy jinoyatchilikka qarshi kurashish va chegara xavfsizligini taʼminlash borasidagi salohiyatini mustahkamlashga yoʻnaltirilgan BOMCA 11 loyihasini amalga oshirishning amaliy jihatlari muhokama etildi.
Oʻtkazilgan uchrashuvlar yakunida tomonlar hamkorlikni yanada rivojlantirishdan manfaatdor ekanliklarini tasdiqlab, oʻzaro hamkorlikning ustuvor yoʻnalishlarini belgilab oldilar va qoʻshma tashabbuslarni amalga oshirish boʻyicha keyingi qadamlarni rejalashtirdilar.
Interpolning Oʻzbekiston Respublikasidagi Milliy markaziy byurosi