Oʻzbekiston Respublikasi Ichki ishlar vaziri general-leytenant Poʻlat Bobojonov ishtirokida ichki ishlar organlari xodimlarining oilalariga yangi zamonaviy xonadonlarning kalitlarini tantanali topshirish marosimi boʻlib oʻtdi
2024-07-20 22:00:00 / Yangiliklar
Mamlakatimizda hukm surayotgan tinchlik va barqarorlik, xalqimizning bunyodkorlik salohiyati va gʻayrat-shijoati, muhtaram yurtboshimizning adolatli ichki va tashqi siyosati tufaylidir.
Shu jumladan, tarixan qisqa davr ichida ichki ishlar organlarini isloh qilish, barcha xodimlarning kundalik xizmat faoliyatini «Xalq manfaatlariga xizmat qilish» gʻoyasi asosida tashkil etish boʻyicha ulkan ishlar amalga oshirilmoqda.
Shu bilan birga ularni ijtimoiy qoʻllab-quvvatlash, xodimlar uchun munosib ish va yashash sharoitlarini yaratishga alohida eʼtibor qaratilayotganini ham eʼtirof etish lozim.
Yurtboshimizning 2017-yil 29-noyabr kunidagi 3413-sonli hamda Vazirlar Mahkamasining 354-sonli qarorlariga asosan ichki ishlar organlari xodimlarini har tomonlama ijtimoiy himoya qilish, oʻz navbatida ularni imtiyozli uy-joylar bilan taʼminlash borasidagi chora-tadbirlar belgilab berilgan edi.
Ayni maqsadda tizimda xizmat qilayotgan xodimlarning turmush sharoitini yaxshilash boʻyicha bir qancha dasturlar hayotga tatbiq etildi.
Jumladan, joriy yilning oʻtgan davri mobaynida 16 000 nafarga yaqin xodimlar, harbiy xizmatchilar va faxriylarga turli xil ijtimoiy yordamlar koʻrsatilgan boʻlsa, ayni paytda 206 nafar ichki ishlar organlari xodimlari imtiyozli ravishda poytaxtimizning Mirzo Ulugʻbek tumanidagi yangi zamonaviy koʻp qavatli xonadonlarga ega boʻlishdi.
Xonadonlarni tantanali topshirish marosimida Ichki ishlar vaziri general-leytenant Poʻlat Bobojonov soʻzga chiqib, mazkur quvonchli kun bilan samimiy muborakbod etib, bu kabi gʻamxoʻrlik va eʼtiborga javoban masʼuliyat va sadoqat bilan xizmat qilish lozimligini taʼkidlab oʻtdi.
Shundan soʻng xodimlarga yangi xonadonlar kalitlari tantanali tarzda topshirildi.
Tadbir davomida shuningdek, mazkur koʻp qavatli turar joy kompleksini qurishda jonbozlik koʻrsatgan usta quruvchilarga vazirlik tomonidan minnatdorchilik bildirildi.
Vazirlik rahbariyati, faxriy xodimlar tadbir davomida xodimlarning yangi xonadonlarida boʻlib, yaratilgan imkoniyat va sharoitlar bilan tanishishdi.
Xonadon vakillari bilan samimiy muloqotda boʻlib, ularning quvonchiga sherik boʻlishdi.
Muxtasar aytganda, ichki ishlar organlari xodimlari uchun amalga oshirilayotgan bu kabi ijtimoiy qoʻllab quvvatlash ularning kelgusidagi faoliyatlarida oʻz xizmat vazifasiga sidqidildan yondashishlarida hamda ona yurtga sadoqat bilan xizmat qilishlarida muhim omil boʻlib xizmat qiladi.