Jizzax viloyati ichki ishlar boshqarmasi boshligʻi general-mayor Gʻayrat Qodirov Arnasoy tumanida boʻldi
2024-07-20 09:30:00 / Yangiliklar
Mahallalarni ijtimoiy-iqtisodiy rivojlantirish borasida amalga oshirilayotgan ishlarning borishi bilan tanishdi. Xususan, Bobur mahallasida istiqomat qiluvchi Ergash Tuvalovning xonadonida boʻlib, oila aʼzolari bilan muloqot qildi.
Maʼlum qilinishicha, ehtiyojmand oila sifatida roʻyxatga olingan xonadonga «Sayxunobod tajribasi» asosida zarur koʻmak koʻrsatilgan. Ushbu yordam asosida oila iqtisodi yaxshilanib, tuxum, sut va sut mahsulotlari hamda tikuvchilik ortidan qoʻshimcha daromad olinyapti.
Boshqarma boshligʻi «Oltin vodiy» mahalla fuqarolar yigʻini binosini bunyod etish ishlarining borishi bilan tanishdi.
Shuningdek, «Yangiboʻston» mahallasida yettilik bilan uchrashdi. Muloqotda jinoyatchilikka qarshi kurashish, huquqbuzarliklarning barvaqt oldini olish yuzasidan koʻrilayotgan choralar muhokama qilindi.
Bundan tashqari tuman markazidagi dehqon bozorini qayta taʼmirlash va aholiga yaratilayotgan shart-sharoitlarni ham koʻzdan kechirdi.
Jizzax viloyati IIB Axborot xizmati