Kasb fidoyisi. Baxtga peshvoz chiqib
2024-06-26 08:05:00 / Yangiliklar
Hayot kutilmagan tuhfalarga boy. Sirdaryo viloyati IIB YHXB Axborot texnologiyalari guruhi yetakchi inspektori, kapitan Elyor Qoʻchqorov ilk xizmat faoliyatini boshlaganida ichki ishlar tizimida axborot texnologiyalaridan foydalanish koʻlami oshib borayotgan davr edi. Ayniqsa, uni tizimdagi Face ID tizimi qiziqtirib qoldi.
Haydovchilik guvohnomasini olishga kelgan fuqaroni suratga olish jarayonida uning shaxsi avtomatik ravishda aniqlanardi. Olingan surat personallashtirish tizimiga yuborilar, bir necha soniyada shaxsi tasdiqdan oʻtardi.
Bu orada YHXga video-kuzatuv tizimi, radarlar kirib keldi. Har tomonlama qulay, inson omilisiz qoidabuzarliklarni qayd etish, shu tarzda ularni kamaytirish imkonini beruvchi oʻziga xos tizim edi bu. Garchand texniklar kuzatuv moslamalarini oʻrnatib berishsa ham, ularning integratsiyasi, kelayotgan axborotlarni qayta ishlash uning zimmasida edi. Bu anchagina murakkab ish boʻlib, tizim qoida buzgan avtomobilni identifikatsiya qilib berar, lekin uning egasiga maʼmuriy bayonnomalarni rasmiylashtirishda xatoga yoʻl qoʻyish mumkin emasdi. Bunday xato norozilik keltirib chiqarardi. Shu sabab Elyor har bir qoidabuzarlikka alohida eʼtibor berar, xatoga yoʻl qoʻymaslikka harakat qilardi.
Elyor Qoʻchqorov viloyat chegaralaridagi muntazam blok-postlardagi kuzatuv kameralari yordamida 2023-yilda olti nafar qidiruvdagi shaxsni aniqlashga muvaffaq boʻldi. Ayniqsa, jarimalarni toʻlamay yurgan haydovchilarni aniqlash borasida yuqori samaradorlikka erishilgandi.
Oʻtgan yili 200 dan ortiq holatda ana shunday avtomobil egalari ushlandi.
Hayot kapitan Elyor Qoʻchqorovga tuhfa qilgan eng katta baxt — uning oilasi. Taqdir unga bir-biridan goʻzal toʻrt nafar qizaloqni tuhfa qildi. Xizmatdan soʻng uyga qaytganida qarshisiga yugurib chiqishadi. Ana shunday lahzalarda baxt unga peshvoz chiqayotganini qalban his qiladi.
Abdurahmon MUSTAFOQULOV, oʻz muxbirimiz.
Sirdaryo viloyati.