Ombudsman boshchiligida ayollar koloniyasiga monitoring tashrifi amalga oshirildi
2024-06-23 02:15:00 / Yangiliklar
Davlat rahbarining 2021-yil 26-iyundagi «Qiynoqqa solish holatlarini aniqlash va ularning oldini olish tizimini takomillashtirishga doir qoʻshimcha chora-tadbirlar toʻgʻrisida»gi Qarorida Oliy Majlisning Inson huquqlari boʻyicha vakili (ombudsman) qiynoqlarning oldini olish maqsadida Jamoatchilik guruhlari bilan birgalikda harakatlanish erkinligi cheklangan shaxslar saqlanadigan joylarga monitoring tashriflarini amalga oshirish tizimini yoʻlga qoʻyish belgilangan.
Shu munosabat bilan, 20-iyun kuni Ombudsman boshchiligida uning huzuridagi Qiynoqlarni oldini olish boʻyicha MPM doirasida faoliyat yurituvchi Jamoatchilik guruhlari, shuningdek, Oliy Majlis Qonunchilik palatasi deputati tomonidan Toshkent viloyatining Zangiota tumanidagi 21-sonli ayollar jazoni ijro etish muassasasiga monitoring tashrifi amalga oshirildi. Jarayonlarda OAV vakillari ham ishtirok etishdi.
Monitoring tashrifida mahkumalarning saqlash sharoitlari, ovqatlanish, mehnat qilish, tibbiy yordam koʻrsatish sharoitlari, uzoq va qisqa muddatli uchrashuv xonalari va kutubxonalar holati oʻrganildi.
Koloniyada 5 ta tikuv, bichish va paypoq toʻqish sexlari mavjud. Mahkumlarga ishbay asosida haq toʻlanib, ish haqi ularning shaxsiy hisob raqamiga oʻtkaziladi. Ushbu hisob raqamiga mahkumalarning yaqinlari ham pul mablagʻlarini oʻtkazishlari mumkin. Koloniyadagi 3 yoshgacha farzandi bor ayollar, nogironligi boʻlgan shaxslar va yoshi katta mahkumalar ishga jalb qilinmasligi maʼlum qilindi. Ular yozma roziligi bilangina ishga jalb qilinishlari mumkin.
Shuningdek, koloniyada ayollar saloni ham mavjud, salonda faoliyat yurituvchi mahkuma oʻz hunarini boshqalarga ham oʻrgatishi uchun sharoitlar yaratilgan.
Koloniyada farzandi bilan yashayotgan mahkumalar bilan suhbatlashilganda, bolalarning barcha ehtiyojlari uchun davlat tomonidan mablagʻ ajratilishi, ularga 24 soat davomida tibbiy yordam koʻrsatish uchun sharoitlar yaratilgani qayd etildi.
Joriy yilda hozirga qadar Oliy Majlisning Inson huquqlari boʻyicha vakili (ombudsman)ga ayollar koloniyasidan 110 dan ortiq murojaatlar kelib tushgan. Monitoring doirasida mahkumalar bilan jamoaviy va yakka tartibda suhbatlar oʻtkazildi. Ombudsmanga murojaat yuborgan mahkumalar bilan ham holi tarzda suhbatlashildi.
Ombudsman tomonidan qiynoqlarni oldini olish boʻyicha monitoring tashriflari yakuni yuzasidan tayyorlangan tahliliy maʼlumotlar, jumladan monitoring jarayonida aniqlangan kamchiliklar Oliy Majlis palatalariga ham taqdim etib kelinmoqda.