Toshkent shahar IIBB Huquqbuzarliklar profilaktikasi boshqarmasi voyaga yetmaganlarga ijtimoiy-huquqiy yordam koʻrsatish Markazida yigʻilish oʻtkazildi
2024-06-20 09:00:00 / Yangiliklar
Bolalar – kelajagimiz. Kelajak haqida qaygʻurmaydigan jamiyatni topish qiyin. xalqimiz esa azaldan bolajon xalq. Har neki yaxshini farzandiga ilinadi.
Dunyo boʻyicha bolalar haq-huquqlariga, emin-erkin, baxtli yashashiga doir qabul qilinadigan har bir hujjat yurtimiz rahbari tomonidan eʼtiborga olinib, amaliyotda qoʻllanilib kelinmoqda.
Yurtimizda hech bir bola dini, rangi, irqi, millatidan qatʼiy nazar oʻz-oʻziga tashlab qoʻyilmagan, uning taqdiriga befarqlik, loqaydlik bizga begona. Respublikamizda voyaga yetmagan qarovsiz qolgan, ijtimoiy himoyaga muhtoj bolalar aniqlanib, ularga har tomonlama yordam berish yoʻlga qoʻyilgan.
Bu savobli va xayrli ishlarga Toshkent shahar IIBB ham bosh-qosh. Bunga Toshkent shahar hokimi, shahar prokurori, DXX Toshkent shahri boʻyicha boshqarmasi boshligʻi va poytaxt IIBB hamkorligida tasdiqlangan qoʻshma Dastur misol boʻla oladi.
Unga koʻra poytaxt hududida yashovchi 15 yoshdan 18 yoshgacha boʻlgan huquqbuzarlik va jinoyat sodir etishga moyil, tarbiyasi ogʻir deb topilgan, salbiy xatti-harakatlar sodir etganligi uchun profilaktik hisobga olinib, «Qizil toifa»ga kiritilgan yoshlar oʻrtasida olib borilayotgan ijobiy ishlar eʼtirofga loyiqdir.
Yuqorida keltirilgan voyaga yetmaganlarning yurtimizning toʻlaqonli farzandlari boʻlib yetishishi, kamol topishini maqsad qilgan Dasturda belgilangan chora-tadbirlar bosqichma-bosqich amalga oshirib kelmoqda.
Toshkent shahar IIBB Huquqbuzarliklar profilaktikasi boshqarmasi voyaga yetmaganlarga ijtimoiy-huquqiy yordam koʻrsatish Markazida oʻtkazilgan yigʻilish ana shu mavzuga qaratildi.
Unda hamkor tashkilotlar masʼullari ishtirok etib, 3-bosqichni samarali oʻtkazish borasida fikr-mulohazalar tinglandi.
Amaliy ishlar uchun jalb qilinadigan kuch-vositalar, amalga oshirilishi lozim boʻlgan chora-tadbirlar, vazifalar belgilab olindi.
Bolalarning salomatligi birinchi navbatdagi vazifa boʻlganligi bois, Markazga qabul qilingan 30 nafar voyaga yetmagan oʻgʻil bolalar Toshkent shahar IIBB Tibbiyot boʻlimi shifokorlari tomonidan koʻrikdan oʻtkazildi.
Oʻsmirlarning jismoniy rivojlanishi, vatanparvarlik ruhida tarbiyalash boʻyicha ular oʻrtasida turli sport oʻyinlari, boshlangʻich harbiy tayyorgarlik mashgʻulotlari oʻtkazilishini eʼtiborga olib, ular sport va harbiy ust-boshlar bilan taʼminlandi.
Tariximizni oʻrganish, qadriyatlarimizni eʼzozlash kabi maʼnaviy-madaniy bilimlarini oshirishga qaratilgan tadbir davomida, bolalar Toshkent viloyatida joylashgan «Zangiota» ziyoratgohiga tashrifi chogʻida majmua yaratilishi tarixi, unda makon topgan azizu avliyolarning umr yoʻllari haqidagi bilimlarga ega boʻldilar.
Shuningdek, maxsus kurs jarayonida yoshlarning poytaxtimizdagi «Hayvonot bogʻi»ga tashrifi uyushtirildi.
Maxsus kursning 3-bosqichi tarbiyalanuvchi yoshlarini vatanparvarlik ruhida, kelajakda yurtimizning munosib farzandlari boʻlib kamol topishi borasida oldinda hali qilinadigan ishlar koʻp va ular amalga oshirilishi shubhasiz.
Maqsad esa bitta – baxtli, farovon kelajagimizni yaratish.
Toshkent shahar IIBB Axborot xizmati