Surxondaryo viloyati IIB Xavfsiz turizmni taʼminlash boshqarmasi xodimlari tomonidan xavfsiz sayohatni taʼminlash borasidagi amalga oshirilgan ishlar
2024-06-08 12:00:00 / Yangiliklar
Ichki ishlar organlarining xavfsiz turizmni taʼminlash boʻlinmalari faoliyatini tartibga soluvchi normativ-huquqiy hujjatlarga muvofiq, Surxondaryo viloyati IIB Xavfsiz turizmni taʼminlash boshqarmasi xodimlari tomonidan joriy yilning oʻzida tashkilot, korxona, umumtaʼlim, sport va prezident maktablari, oliy taʼlim muassasalari bilan tuzilgan shartnomalarga asosan, jami 48 marotaba turistik guruhlar uchun uyushtirilgan sayohatini xavfsiz va maroqli oʻtkazish maqsadida mamlakatimizning turizm salohiyati yuqori boʻlgan Qashqadaryo, Samarqand, Buxoro, Jizzax, Sirdaryo va Navoiy viloyatlari hamda Toshkent shahriga avtotransportda harakatlanish vaqtida kuzatish ishlari tashkil qilindi.
Mahalliy turistlarimiz, turizm namoyishi obyektlariga hamda ulugʻ ajdodlarimizning ilm-fan, madaniyat va maʼnaviyat rivojiga qoʻshgan hissalari, koʻhna va qadimiy shaharlarida mangu koʻnim topgan tabarruk zotlarning kelajak avlod uchun qoldirgan dunyoviy va diniy taʼlimot yoʻnalishlaridagi buyuk ishlari bilan yaqindan tanishtirildi.
Sayohatchilar tur yakunlari boʻyicha turistik xizmat koʻrsatish subyektlariga taassurotlarga boy sayohat tashkil etilganligi uchun minnatdorchilik, shuningdek, xavfsizligi taʼminlangan sharoitlarda madaniy hordiq olgani uchun xavfsiz turizmni taʼminlash boʻlinmasi xodimlariga oʻz ehtiromlarini bildirishdi.
IIV Transport va turizm obyektlarida xavfsizlikni taʼminlash departamenti Axborot guruhi