Namangan viloyati IIB rahbariyati tomonidan ichki ishlar organlari faoliyati va kuz-qish mavsumiga tayyorgarlik ishlari atroflicha oʻrganilmoqda
2025-11-10 10:35:00 / Yangiliklar
Xususan, Norin tumanida olib borilgan oʻrganishlar davomida tungi vaqtlarda xizmat olib borayotgan naryadlarning faoliyati, shuningdek, ijtimoiy soha obyektlarining kuz-qish mavsumiga tayyorgarlik darajasi atroflicha koʻzdan kechirildi. Tuman markazida xizmat olib borayotgan xodimlarga yoʻriqnoma oʻtkazilib, mahallalarda jinoyatchilikning oldini olish, huquqbuzarliklarga chek qoʻyish va aholi osoyishtaligini taʼminlash boʻyicha aniq topshiriqlar berildi.
Shuningdek, tuman tibbiyot birlashmasida mavsumga tayyorgarlik holati oʻrganilib, shifoxonada aholiga yaratilgan shart-sharoitlar, isitish tizimining barqarorligi hamda yoqilgʻi zaxiralarining saqlanish holati tekshirildi. Masʼul rahbarlarga mavsumni betalofat oʻtkazish va energiya taʼminotining uzluksizligini taʼminlash yuzasidan koʻrsatmalar berildi.
Shundan soʻng, qoʻriqlash boʻlimi faoliyati tahlil qilinib, kuz-qish mavsumida xizmat samaradorligini yanada oshirish boʻyicha zarur vazifalar belgilandi.
Shu bilan birga, boshqarma boshligʻi Davlatobod tumanidagi vaqtincha saqlash hibsxonasi, Yangi Namangan tumanidagi maxsus qabulxona hamda voyaga yetmaganlarga ijtimoiy-huquqiy yordam koʻrsatish markazlarida boʻlib, u yerlarda xodimlar uchun yaratilgan xizmat sharoitlari, shaxslarning saqlanish holati, xavfsizlik chora-tadbirlari va mavsumga tayyorgarlik darajasi batafsil oʻrganildi.
Oʻrganishlar jarayonida aniqlangan kamchiliklarni qisqa muddatda bartaraf etish, isitish tizimlarining uzluksiz ishlashini doimiy nazoratda ushlab turish, yongʻin va texnik xavfsizlik qoidalariga qatʼiy rioya etish hamda mavsumni betalofat oʻtkazish maqsadida zarur chora-tadbirlarni amalga oshirish boʻyicha masʼul rahbarlar va xodimlarga tegishli vazifalar yuklatildi.
Namangan viloyati IIB Axborot xizmati