O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi

Millatlararo munosabatlar va xorijdagi vatandoshlar masalalari bo‘yicha qo‘mitasida “Birodar shaharlar xalq diplomatiyasining yorqin namunasi” mavzusidagi davra suhbati va anglashuv to‘g’risidagi memorandumni imzolash marosimi bo‘lib o‘tdi.

Unda Millatlararo munosabatlar va xorijdagi vatandoshlar masalalari bo‘yicha qo‘mitasi raisi, Birodar shaharlar alyansi, O‘zbekiston tarixi davlat muzeyi vakillari, Madaniy meros agentligi vakillari, O‘zbekistonda SHHT Xalq diplomatiyasi markazi direktori, “Vatandoshlar” jamoat fondi faollari, Toshkent shahar xotin qizlar tadbirkorlik markazi a’zolari, do‘stlik jamiyatlari a’zolari, viloyat hokimiyatlaridan faollar (onlayn tarzda), xorijdagi vatandoshlar, olimlar va OAV xodimlari ishtirok etdilar.

Global integratsiya jarayonlari kuchayib borayotgan hozirgi davrda davlatlararo munosabatlar faqat siyosiy yoki iqtisodiy doiradagina emas, balki xalq diplomatiyasi orqali ham rivojlanmoqda. Xalq diplomatiyasi – bu xalqlarning o‘zaro madaniy, ilmiy, ijtimoiy aloqalar orqali do‘stlik va hamkorlikni mustahkamlashga qaratilgan faoliyat bo‘lib, u ko‘pincha hukumatlararo aloqalarni to‘ldiradi va boyitadi. Bugun shaharlar nafaqat iqtisodiy yoki madaniy markazlar, balki xalqaro muloqotning faol sihtirokchilariga aylanmoqda. Turli mamlakatlar shaharlarining o‘zaro birodar shaharlar, hamkor hududlar, do‘stona munosabatlar o‘rnatilgan shaharlar sifatida e’tirof etilishi xalq diplomatiyasining amaliy ifodasidir. Shaharlarning xalqaro hamkorlikdagi faolligi xalq diplomatiyasini yanada kuchaytiradi. Ular orqali xalqlar bir-birini yaqindan taniydi, madaniyatlar yaqinlashadi, urf-odat va qadriyatlar o‘zaro boyiydi. Shuning uchun ham shaharlar xalqaro tinchlik, barqarorlik va taraqqiyot yo‘lidagi ishonchli ko‘prik vazifasini o‘tamoqda. 

Shu munosabat bilan, xalqaro miqyosda shaharlararo do‘stlik  va o‘zaro anglashuvni  kuchaytirish, shuningdek, turli mamlakatlar o‘rtasida ijtimoiy-madaniy hamkorlikni kengaytirish, birodar shaharlar o‘rtasida xalq diplomatiyasini yo‘lga qo‘yish maqsadida Birodar shaharlar alyansi tomonidan tashkil qilingan davra suhbatida yuqorida qayd etilgan mavzular muhokama qilindi. Ishtirokchilar tomonidan xalq diplomatiyasinining yorqin namunasi bo‘lgan birodar shaharlar o‘rtasida o‘zaro hamkorlikni yo‘lga qo‘yish yuzasidan fikr va mulohazalar bildirildi.   

Davra suhbati mobaynida Birodar shaharlar alyansi hamda O‘zbekiston tarixi davlat muzeyi o‘rtasida anglashuv memorandumini imzolash marosimi bo‘lib o‘tdi.  Ushbu hujjat tomonlar o‘rtasidagi o‘zaro hamkorlikni mustahkamlash, xalq diplomatiyasini rivojlantirish va tarixiy-ma’naviy merosni keng targ’ib etish borasida qo‘shma loyihalarni amalga oshirishni ko‘zda tutadi. Memorandum doirasida ikki tomon o‘zaro taklif va tashabbuslarni amalga oshirish, qo‘shma tadbirlar, ko‘rgazmalar, ilmiy-amaliy anjumanlar va madaniy almashinuvlar tashkil etish bo‘yicha kelishib oldilar.

Tadbir “xalq diplomatiyasi” tushunchasining amaliy ifodasi sifatida, o‘zaro hurmat va do‘stlikka asoslangan aloqalarni mustahkamlash, shuningdek, O‘zbekistonning ijobiy xalqaro imijini mustahkamlashga xizmat qiladi.