O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi binosida 30-iyul – Xalqlar do‘stligi kuni munosabati bilan o‘tkazilayotgan “Do‘stlik” festivali yuzasidan matbuot anjumani tashkil etildi.

Tadbirda Qo‘mita rahbariyati, milliy madaniy markazlar, do‘stlik jamiyatlari, Birodar shaharlar alyansi vakillari va ommaviy axborot vositalari xodimlari ishtirok etdi. Anjumanda “Do‘stlik festivali” doirasida rejalashtirilgan asosiy tadbirlar haqida batafsil ma’lumot berildi.
           Qo‘mita raisi Q. Sariyev o‘z tabrigida anjuman ishtirokchilarini 30-iyul – Xalqlar do‘stligi kuni bilan qutlab, festival O‘zbekiston Respublikasi Prezidentining tashabbusi bilan tashkil etilganini va uning asosiy maqsadi millatlararo totuvlikni mustahkamlash, o‘zaro ishonch muhitini rivojlantirish, shuningdek, xorijdagi vatandoshlar bilan hamkorlikni mustahkamlash ekanini ta’kidlab o‘tdi.
            Qo‘mita axborot xizmati rahbari O. Quvondiqov festival doirasida o‘tkaziladigan tadbirlarni OAVda keng yoritilishi yuzasidan axborot berdi.

            Matbuot anjumani davomida jurnalistlar savollariga atroflicha javoblar berildi. Tadbir ishtirokchilari o‘z fikr-mulohazalarida mamlakatda qaror topgan millatlararo bag‘rikenglik va totuvlik muhitini asrab-avaylash har birimizning fuqarolik burchimiz ekanligini ta’kidladilar.
            Ta’kidlash joizki, festival doirasida 25-31–iyul kunlari mamlakatimizda turli madaniy, ma’naviy-ma’rifiy, ilmiy-amaliy tadbirlar o‘tkazilishi rejalashtirilgan.

Dastur doirasida:

26-iyul soat 19.00 – Toshkent shahridagi Kasaba uyushmalari saroyida festival munosabati bilan gala-konsert;

28-iyul soat 10.00 – “Do‘stlik nigohi” qardosh xalqlar fotosuratlari ko‘rgazmasi (Toshkent fotochilar uyi);

29–iyul soat 10.00 – “Do‘stlik nigohi” qardosh xalqlar fotosuratlari ko‘rgazmasi (Toshkent fotochilar uyi);

soat 17.00 – “Ona zamin bag‘ridan...” xorij va yurtimizdagi turli xalqlar amaliy ustalarining xalqaro hunarmandchilik ko‘rgazma-yarmarkasi (Navro‘z bog‘i);

soat 15.00 – “Qardoshlik mushoirasi” turli ellar do‘stligiga bag‘ishlab ijodiy uchrashuv (Yozuvchilar uyushmasida);

soat 17.00 – Millatlararo munosabatlar qo‘mitasi binosi yonida joylashgan maydonda “O‘zbekiston – yagona Vatan!” shiori ostida mamlakatimizdagi milliy madaniy markazlarning ko‘rgazmalari hamda badiiy havaskor jamoalarning chiqishlari;

30–iyul soat 10.00 – “Umummilliy birdamlikni ta’minlash va xorijdagi vatandoshlar bilan aloqalarni mustahkamlash Yangi O‘zbekiston taraqqiyotining muhim asosi” mavzusida xalqaro konferensiya;

soat 15.00 –  “Xalqlar do‘stligi” ko‘krak nishoni bilan taqdirlash marosimi;

31-iyul soat 10.00 da “Do‘stlik” festivali yakunlari yuzasidan brifing o‘tkaziladi.

Festival kunlari Toshkent shahri va respublikamizning barcha hududlaridagi nufuzli tomosha maydonlari hamda so‘lim hiyobonlari va bog‘larida turli madaniy, ma’naviy-ma’rifiy, ilmiy-amaliy kabi bayramona tadbirlar o‘tkaziladi.

Matbuot anjumanida jurnalistlarni qiziqtirgan savollarga atroflicha javob qaytarildi.