O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi

Millatlararo munosabatlar va xorijdagi vatandoshlar masalalari bo‘yicha qo‘mitada “Birodar shaharlar o‘rtasidagi aloqalarni mustahkamlashda xorijdagi vatandoshlarning o‘rni” mavzusiga bag‘ishlangan davra suhbati va hamkorlik memorandumini imzolash marosimi bo‘lib o‘tdi.

Tadbir doirasida “Birodar shaharlar alyansi”, “O‘zbekiston – Litva” do‘stlik jamiyati va Litvadagi O‘zbekiston madaniyat markazi o‘rtasida anglashuv memorandumi imzolandi. Hujjatga ko‘ra, tomonlar O‘zbekiston va Litva o‘rtasidagi madaniy-gumanitar hamkorlikni kengaytirish, birodar shaharlar o‘rtasidagi aloqalarni mustahkamlash hamda xorijdagi vatandoshlar ishtirokida madaniy-ma’rifiy tashabbuslarni amalga oshirish bo‘yicha kelishib oldilar.

Mazkur davra suhbati xalqaro aloqalarning muhim yo‘nalishlaridan biri — xalq diplomatiyasida xorijdagi vatandoshlarning tutgan o‘rniga e’tibor qaratildi. Xususan, birodar shaharlar o‘rtasidagi madaniy va ijtimoiy hamkorlik, turizm va ta’lim loyihalari, do‘stlik jamiyatlari faoliyatidagi ijobiy tajribalar atroflicha tahlil qilindi.

Tadbirda Millatlararo munosabatlar va xorijdagi vatandoshlar masalalari bo‘yicha qo‘mitasi mas’ul xodimlari, “Birodar shaharlar alyansi” vakillari, “O‘zbekiston – Litva” do‘stlik jamiyati rahbari, Litvadagi madaniyat markazi yetakchisi, “Vatandoshlar” jamoat fondining faollari ishtirok etdilar.

Uchrashuv davomida xorijdagi o‘zbek jamoalarining ikki davlat o‘rtasidagi do‘stlik aloqalarini mustahkamlashdagi hissasi, ularning tashabbuslari orqali amalga oshirilayotgan madaniy loyihalar, shuningdek, O‘zbekistonning xalqaro maydondagi ijobiy imijini shakllantirishdagi faoliyati alohida ta’kidlandi.

E’tirof etilishicha, xorijdagi vatandoshlar — bu nafaqat o‘z milliy madaniyatini asrab-avaylayotgan jamoalar, balki ularning yashayotgan mamlakati bilan O‘zbekiston o‘rtasidagi do‘stlik ko‘prigini barpo etayotgan xalq diplomatiyasining ishonchli elchilaridir. Ular tomonidan tashkil etilgan madaniyat markazlari, do‘stlik jamiyatlari va nodavlat tuzilmalar orqali har yili o‘nlab xalqaro tadbirlar, ko‘rgazmalar, turizm forumi va ta’lim almashuv dasturlari amalga oshirilmoqda.

Shubhasiz, birodar shaharlar o‘rtasidagi aloqalar bugun yangi bosqichga ko‘tarilmoqda. Bu esa xorijdagi vatandoshlar bilan tizimli hamkorlikni yanada kuchaytirish, ularning salohiyati va tashabbuslarini qo‘llab-quvvatlash orqali erishilmoqda.

Qo‘mita Axborot xizmati