O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi

Mazkur konferensiya universitet Filologiya fakulteti huzuridagi “O‘zbek adabiyotini o‘qitish metodikasi” kafedrasi tashabbusi bilan tashkil etildi. Unda O‘zbekistonning turli hududlaridan tashrif buyurgan professor-o‘qituvchilar bilan bir qatorda Tojikiston, Turkiya va Ozarbayjon davlatlaridan yetakchi olimlar ishtirok etib, ilmiy ma’ruza va maqolalari bilan qatnashdi.

Anjumanning ochilish marosimida so‘zga chiqqanlar o‘zbek filologiyasi bugungi kunda nafaqat milliy, balki xalqaro ilmiy makonning muhim yo‘nalishlaridan biri sifatida rivojlanib borayotganini ta’kidladi. Xususan, konferensiyada Tojikiston Respublikasi Sug‘d viloyati O‘zbeklar ma’naviyat va ma’rifat markazi raisi, pedagogika fanlari nomzodi, “Do‘stlik” ordeni sohibi Ilhom Yusupov ishtirok etib, mavzu doirasida mazmunli fikr-mulohazalar bildirdi.

— Bugungi globallashuv sharoitida o‘zbek tili va adabiyotini o‘qitishda zamonaviy metodikalar, innovatsion yondashuvlar va ilmiy integratsiya muhim ahamiyat kasb etmoqda, — deya qayd etdi u o‘z chiqishida.

Konferensiya davomida o‘zbek filologiyasining hozirgi taraqqiyot yo‘nalishlari, adabiyotshunoslikdagi yangi ilmiy qarashlar, ta’lim jarayonida raqamli va innovatsion metodlarni qo‘llash masalalari atroflicha muhokama qilindi. Ilmiy sessiyalar ishtirokchilar o‘rtasida tajriba almashish, qo‘shma tadqiqotlar va kelgusidagi hamkorlik loyihalarini shakllantirishga xizmat qildi.

Tashkilotchilar ta’kidlashicha, mazkur anjuman o‘zbek filologiyasini rivojlantirish, uni o‘qitish metodikasini zamon talablariga moslashtirish va yosh tadqiqotchilarni ilmiy faoliyatga jalb etishda muhim maydon bo‘lib xizmat qilmoqda.