O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi

Kemerovoda o‘tkazilgan uchrashuv Sibirning eng yirik infratuzilma loyihalari — Sibir madaniy majmuasi va yirik turar-joy massivlarida ishlayotgan yurtdoshlar ishtirokida bo‘lib o‘tdi. Bugungi kunda ushbu obyektlarda 2 500 nafardan ortiq O‘zbekiston fuqarosi mehnat qilayotgani qayd etildi. Delegatsiya a’zolari ularga mehnat sharoitlari, ijtimoiy kafolatlar, konsullik ko‘magi bo‘yicha amaliy ma’lumotlar taqdim qildi.

Tadbirlar davomida O‘zbekistonda so‘nggi yillarda amalga oshirilayotgan keng ko‘lamli islohotlar, xususan, xorijdagi vatandoshlarning huquqlarini himoya qilish, ular bilan tizimli aloqalarni kuchaytirish bo‘yicha yangi yondashuvlar haqida ham ma’lumot berildi. “Prezident tashabbuslari asosida vatandoshlar bilan muntazam muloqot, ularning huquqiy himoyasi va qo‘llab-quvvatlanishini yangi bosqichga ko‘tarish maqsad qilingan”, — dedi delegatsiya vakillari.

Delegatsiya a’zolari mehnatkashlar yashayotgan yotoqxona va ish joylarini ko‘zdan kechirdi. Mahalliy qonunchilikka amal qilish, rasmiy bandlik, huquqiy xavfsizlik kabi masalalar bo‘yicha tushuntirishlar berildi. Hamyurtlarimiz esa Bosh konsulxonaning doimiy aloqasi, sayyor konsullik xizmatlarining muntazam o‘tkazilishi natijasida huquqbuzarlik holatlari deyarli uchramayotganini ta’kidladilar.

Novosibirsk viloyatiga tashrif doirasida “TexnoPan”, “Start”, G‘arbiy Sibir sanoat kompaniyasi kabi yirik korxonalarda uchrashuvlar tashkil etildi. Ishchilar bilan suhbatlar chog‘ida ular mehnat sharoitlari, yashash joylari va ijtimoiy kafolatlarga oid fikrlarini bildirdilar.

Shuningdek, Kemerovo viloyati jamoatchiligi bilan hamkorlikda Leninsk-Kuznetskiy shahrida o‘zbekistonlik san’atkorlar ishtirokida keng ko‘lamli madaniy-ma’rifiy tadbir o‘tkazildi. Novosibirskdagi “Osiyo–Sibir” ulgurji-taqsimlash markazida ishlovchi fuqarolar uchun ham konsert dasturi va bayramona tadbir tashkil qilindi.

Mutaxassislar fikricha, bu kabi uchrashuvlar vatandoshlar bilan tizimli muloqotni mustahkamlaydi, ularning huquqiy savodxonligini oshiradi hamda ijtimoiy integratsiyani yengillashtiradi. Kelgusida bunday mexanizmlarni yanada kengaytirish rejalashtirilgan.