Andijonda “O‘zbekiston – millatlararo totuvlik yurti” festivali bo‘lib o‘tdi
2025-12-02 09:20:00 / Yangiliklar
Tadbir davomida Andijon viloyatida faoliyat yuritayotgan rus, arman va koreys milliy madaniyat markazlari o‘z milliy kuy-qo‘shiqlari, raqslari, liboslari va an’anaviy taomlari bilan ishtirokchilarga o‘ziga xos madaniy ko‘prik yaratdi. Institut maydonida tashkil etilgan ko‘rgazmalar, ijodiy chiqishlar va milliy san’at namunalarining namoyishi tomoshabinlarda katta qiziqish uyg‘otdi.
Shuningdek, festival doirasida talabalar uchun ma’naviy meros, diniy bag‘rikenglik va millatlararo munosabatlar mavzularida ma’ruzalar o‘qildi, ochiq muloqot va savol-javoblar tashkil etildi. Uchrashuvlarda O‘zbekistonda turli elatlar asrlar davomida yonma-yon, totuv va hamjihat yashab kelgani ta’kidlandi.
Interaktiv tanlovlar, milliy taomlar ko‘rgazmasi va ijodiy jamoalarning chiqishlari festivalning mazmun-mohiyatini yanada boyitdi. Eng faol ishtirokchilar tashakkurnoma va esdalik sovg‘alari bilan taqdirlandi.
Tadbir yakunida barcha millat vakillari sahnaga chiqib, do‘stlik va birdamlikni ifodalovchi yakuniy kompozitsiyani ijro etdilar. Institut ma’muriyatining ta’kidlashicha, bu kabi festival va uchrashuvlar muntazam davom ettiriladi.
“O‘zbekistonning bugungi yutug‘i — aynan birlik, totuvlik va o‘zaro hurmatning mustahkamligidir. Biz bu qadriyatlarni yoshlar qalbiga singdirishimiz zarur,” — dedi tadbir tashkilotchilardan biri.