Samarqand viloyati Samarqand tumani hokimligi

Davlat gerbi – mustaqilligimiz va suverenitetimiz timsoli
Har bir mustaqil davlatning o‘z ramzlari bo‘lib, ular xalqning tarixi, qadriyatlari va kelajakka bo‘lgan intilishlarini o‘zida mujassam etadi. O‘zbekiston Respublikasining Davlat gerbi ham ana shunday muqaddas timsollardan biri bo‘lib, u yurtimizning mustaqilligi, suvereniteti va milliy g‘ururining yorqin ifodasidir.
O‘zbekiston Respublikasi Davlat gerbi 1992-yil 2-iyulda qabul qilingan. Gerb markazida qanotlarini keng yoygan afsonaviy Humo qushi tasvirlangan bo‘lib, u baxt-saodat, erkinlik va ezgulik ramzi hisoblanadi. Humo qushining ortida esa yurtimizda tinchlik va farovonlik hukm surishini anglatuvchi quyosh nurlari hamda tog‘lar va daryolar tasviri joy olgan.
Gerbning chap tomonida bug‘doy boshoqlari, o‘ng tomonida esa ochilgan paxta chanoqlari tasvirlangan. Bu esa xalqimizning mehnatsevarligi, mo‘l-ko‘lchilik va farovon hayotga intilishini ifodalaydi. Gerbning yuqori qismida sakkiz qirrali yulduz, uning ichida esa yarim oy va yulduz tasviri aks ettirilgan bo‘lib, ular xalqimizning qadimiy ma’naviy qadriyatlari va ezgu orzu-intilishlarini ifodalaydi. Pastki qismida esa davlatimiz bayrog‘i ranglaridagi lenta ustiga “O‘zbekiston” degan yozuv bitilgan.
Davlat gerbi nafaqat rasmiy hujjatlar va davlat idoralarida, balki har bir fuqaroning qalbida ham Vatanga sadoqat va yurt ravnaqiga daxldorlik tuyg‘usini uyg‘otadi. Uni e’zozlash va hurmat qilish – ona Vatanimizga, uning tarixi va kelajagiga bo‘lgan hurmatning yorqin namunasidir.
Bugungi kunda yosh avlod qalbida vatanparvarlik tuyg‘ularini mustahkamlashda Davlat gerbining o‘rni beqiyos. Chunki davlat ramzlarini chuqur anglagan va ularga hurmat bilan munosabatda bo‘lgan avlodgina yurt taraqqiyoti va xalq farovonligi yo‘lida fidoyilik bilan xizmat qiladi.
Xulosa o‘rnida aytish mumkinki, Davlat gerbi – bu shunchaki ramz emas, balki xalqimizning asriy orzu-umidlari, mustaqilligi va suverenitetining mujassam ifodasidir. Uni asrab-avaylash va unga yuksak hurmat ko‘rsatish har bir O‘zbekiston fuqarosining sharafli burchidir.

Tuman hokimligi bosh yuriskonsulti D.Toxirov