Sirdaryo viloyati jamoat joylaridagi bepul «Wi-Fi»dan foydalanish nuqtalari yanada ko‘paydi
2025-07-24 10:50:00 / Yangiliklar
Bugungi kunda mamlakatimizda ichki turizmni rivojlantirishga juda katta e’tibor berilmoqda. Bunda, albatta xorij fuqarolarimi yoki mamlakatimiz aholisi bo‘ladimi qadimiy qadamjolar, istirohat bog‘lari, muzeylarga tashrif buyurishadi.
Diqqatga sazovor aholi gavjum joylarda telekommunikatsiya tarmoqlari, hususan internet xizmatlarini uzluksiz ko‘rsatilishi o‘ta muhim. Shu sababli hududlarda bepul Wi-Fi nuqtalari tashkil etilgan.
O‘zbekiston Respublikasi Prezidentining 2020-yil 5-oktyabrda “Raqamli O‘zbekiston – 2030” strategiyasini tasdiqlash va uni samarali amalga oshirish chora-tadbirlari to‘g‘risida”gi PQ-6079-son farmoni va mazkur farmonning
9-ilovasi bilan “Raqamli O‘zbekiston – 2030” strategiyasi doirasida 2020-2022 yillarda Sirdaryo viloyatini raqamli transformatsiya qilish bo‘yicha loyihalarni amalga oshirish Yo‘l xaritasi” va “Raqamli O‘zbekiston – 2030” strategiyasi doirasida 2020-2022 yillarda Sirdaryo viloyatini raqamli transformatsiya qilish dasturi” tasdiqlangan.
Keyinchalik O‘zbekiston Respublikasi Vazirlar Mahkamasining 2021-yil 19-noyabrdagi “O‘zbekiston Respublikasi telekommunikatsiya infratuzilmasini yanada rivojlantirish chora-tadbirlari to‘g‘risida”gi VMQ-699-son qarori 11-ilovasi bilan “2022–2024 yillarda Sirdaryo viloyati telekommunikatsiya infratuzilmasi rivojlanishining maqsadli ko‘rsatgichlari” hamda “Sirdaryo viloyati telekommunikatsiya infratuzilmasini yanada rivojlantirish bo‘yicha 2022–2024 yillarda amalga oshirilishi rejalashtirilgan loyihalar yuzasidan chora-tadbirlar rejasi” tasdiqlangan edi.
“Yo‘l xaritasi” hamda “Dastur”ning 6-bandida Telekommunikatsiya operatorlari va provayderlari mablag‘lari hisobidan Wi-Fi texnologiyasi yordamida jamoat joylarda simsiz keng polosali tarmoqlarini kengaytirish belgilangan edi.
Bunda, Telekommunikatsiya operatorlari va Mobil aloqa operatorlari mablag‘lari hisobidan viloyat miqyosida mobil aloqa tarmog‘ini va mobil internet qamrovini kengaytirish, optik tolali aloqa liniyalari tortish, keng polosali tarmoq sig‘imini oshirish bilan bir qatorda Sirdaryo viloyatidagi jamoat joylarida, aeroport, vokzal, mehmonxona va boshqa turistik obyektlarda Wi-Fi zonalarni tashkil etish belgilangan.
Mazkur Farmon va qarorning ijrosini ta’minlash yuzasidan “O‘zbektelekom” AK Janubi-G‘arbiy filiali tomonidan Sirdaryo viloyatining aholi eng ko‘p tashrif buyuradigan hududlarida aholi, yoshlar va tashrif buyuradigan mehmonlar uchun bepul Wi-Fi nuqtalari tashkil etilgan bo‘lib, bugungi kunda viloyatimizda 16 ta hududda 21 ta bepul Wi-Fi nuqtalari uzluksiz faoliyat ko‘rsatmoqda.
Jumladan, Guliston shahrining Shodlik mahallasida “Guliston madaniyat va istirohat bog‘i”, “Bilimdonlar maskani”, Namuna mahallasida “Markaziy yurt bayrog‘i maydoni”, “Xotira maydoni”, Taraqqiyot mahallasida “Sirdaryo viloyat tarixi va madaniyati” davlat muzeyi, “Guliston temir yo‘l vokzali”, Xovos tumani Xovosobod mahallasida “Ko‘hna Xovos” arxeologik yodgorligi, “Saddi-Sayid jome” masjidi, “Sher bobo” maqbarasi, “Yusuf bobo” maqbarasi, “Bibi Xadicha” maqbarasi, Yangiyer shahar Fazilat mahallasida “Sirli olam” madaniyat va istirohat bog‘i, Sirdaryo tumani Haqiqat mahallasida “O‘zbekiston-Xitoy” Do‘stlik bog‘i, Sayxunobod tumani Shodlik mahallasida “G‘alaba” madaniyat va istirohat bog‘i, Shirin shahar Bunyodkor mahallasida “Alisher Navoiy madaniyat va istirohat bog‘i”, Amir Temur mahallasida “Xotira maydoni va istirohat bog‘i”, Farhod mahallasida “Yoqub ota guzari”, Do‘stlik mahallasida “Yoshlar hiyoboni”, Guliston tumani Dehqonobod shaharchasi Ibrat mahallasida “Istirohat bog‘i” hamda Boyovut tumani Boyovut shaharchasi Ijodkor mahallasida “Yurt bayrog‘i maydoni”da Unifi qurilmalari o‘rnatilgan.
Tarmoq tashkil etuvchilar optik tolali aloqa kabeli hamda Unifi qurilmalarining doimiy ishlashi “O‘zbektelekom” AK Janubi-G‘arbiy filiali tomonidan dasturiy tizim orqali kuzatib boriladi hamda “O‘zkomnazorat” inspeksiyasi Sirdaryo viloyati hududiy shu’basi tomonidan har oyda bepul Wi-Fi nuqtalar ishchi holati joyiga chiqqan holda monitoring qilinadi.
Viloyatimiz aholisi va Yoshlarimiz bevosita Wi-Fi nuqtalar tashkil etilgan hududlarga borib, telefon qurilmasidan Wi-Fi funksiyasini yoqib Uzclouddan sms orqali avtorizatsiyadan o‘tishadi. Foydalanuvchi tomonidan bir marotaba tarmoqqa ulansa bo‘ldi qayta avtorizatsiya so‘ralmaydi. Bepul asosda 2 Mbit/s, pullik asosda 10 Mbit/s tezlikdagi internet xizmatlari taqdim etilmoqda.
Mahbuba Raxmatbayeva,
“O‘zkomnazorat” inspeksiyasining Sirdaryo viloyati hududiy sho’basi
Telekommunikatsiyalar va pochta aloqa tarmoqlarini nazorat qilish bo‘yicha yetakchi mutaxassisi.