30 iyun – Yoshlar kuni munosabati bilan Oliy Majlis Senati Raisi Tanzila Narbayevaning volontyor yoshlar bilan ochiq muloqoti o‘tkazildi.
2026-06-30 14:00:00 / Yangiliklar
Muloqotda senatorlar, Yoshlar ishlari agentligi rahbariyati, Senat huzuridagi Yoshlar parlamenti a’zolari, O‘zbekiston Volontyorlar assotsiatsiyasi, qator volontyorlik tashkilotlari vakillari hamda ommaviy axborot vositalari xodimlari ishtirok etdi.
Volontyor yoshlar o‘z tashabbuslari, hududlarda volontyorlik faoliyatini yanada rivojlantirish, sohaga oid qonunchilikni takomillashtirish yuzasidan taklif va mulohazalarini bildirdi.
Shuningdek, yoshlarni qiziqtirgan dolzarb masalalar muhokama qilinib, ilgari surilgan takliflarni amaliyotga tatbiq etish mexanizmlari yuzasidan fikr almashildi.
Muloqot davomida faol volontyorlarning jamiyat taraqqiyotiga qo‘shayotgan hissasi alohida e’tirof etildi. Volontyorlik madaniyatini keng ommalashtirish, yoshlarning fuqarolik faolligini qo‘llab-quvvatlash hamda ushbu harakatni yanada rivojlantirish borasidagi ishlar izchil davom ettirilishi lozimligi ta’kidlandi.
Volontyorlik harakati doirasida amalga oshirilayotgan ijtimoiy ahamiyatga ega loyihalar ham namoyish etildi. Ko‘rgazmada ta’lim, ekologiya, madaniyat, sport, xayriya va ijtimoiy himoya yo‘nalishlaridagi ilg‘or tashabbuslar, innovatsion g‘oyalar hamda istiqboldagi loyihalarni ko‘rish mumkin edi.
Tadbir yakunida Senat huzuridagi Yoshlar parlamenti, O‘zbekiston Volontyorlar assotsiatsiyasi hamda “Ziyo Forum” jamg‘armasi o‘rtasida Hamkorlik memorandumi imzolandi.