Surxondaryo viloyatida yoshlar bandligini ta'minlash bo‘yicha mehnat yarmarkalari tashkil etildi
2026-09-10 17:30:00 / Majlislar
O‘zbekiston Respublikasi Favqulodda vaziyatlar vazirining 34-sonli buyrug‘i ijrosini ta'minlash maqsadida Surxondaryo viloyatining Sariosiyo va Muzrabot tumanlarida Favqulodda vaziyatlar bo‘limi xodimlari hamda Bandlik bo‘limi mutaxassislari hamkorligida yoshlar bandligini ta'minlashga qaratilgan mehnat yarmarkalari va ochiq muloqot tadbirlari tashkil etildi.
Jumladan, Sariosiyo tumanining "Madankon" mahallasida biriktirilgan yoshlar bilan uchrashuv o‘tkazilib, ish bilan ta'minlanish istagini bildirgan fuqarolarga mavjud bo‘sh ish o‘rinlari haqida batafsil ma'lumotlar berildi hamda mehnat yarmarkasi tashkil etildi.
Shuningdek, Muzrabot tumani hokimligi binosida "Otaliqqa olingan" hamda ishsiz yoshlar ishtirokida ochiq muloqot tarzida mehnat yarmarkasi o‘tkazilib, ularga bo‘sh ish o‘rinlari, kasb-hunarga o‘qitish imkoniyatlari va bandlikka ko‘maklashish bo‘yicha yaratilgan shart-sharoitlar yuzasidan tushuntirishlar berildi.
Mazkur tadbirlar yoshlarning bandligini ta'minlash, ularni doimiy ish o‘rinlariga yo‘naltirish hamda ijtimoiy qo‘llab-quvvatlashga xizmat qildi.
