Surхоndаryo vilоyati Favqulodda vaziyatlar boshqarmasi

Surxondaryo viloyati Favqulodda vaziyatlar boshqarmasi boshlig‘i podpolkovnik Sh. Shukurov tomonidan Sherobod tumanidagi "Sherobod" markaziy oziq-ovqat va kiyim-kechak bozorida “Dolzarb 60 kun” tadbirlari doirasida yong‘in xavfsizligini ta’minlashga qaratilgan profilaktik ishlar olib borildi. Tadbir davomida bozor hududining yong‘inga qarshi holati o‘rganilib, yong‘in-qutqaruv texnikalarining bozor ichki hududlariga bemalol kirib borish imkoniyatlari amaliy tarzda sinovdan o‘tkazildi. Shu maqsadda yong‘in-qutqaruv avtomobili bozor ichki yo‘laklari bo‘ylab harakatlantirildi. O‘rganish jarayonida qutqaruv avtomobillarining harakatlanishiga to‘sqinlik qilayotgan sun’iy to‘siqlar aniqlanib, ular zudlik bilan olib tashlatildi. Bozor ma’muriyatiga favqulodda vaziyatlar sodir bo‘lganda maxsus texnikalarning erkin harakatlanishini ta’minlash, ichki yo‘laklarni doimo ochiq saqlash hamda yong‘in xavfsizligi talablariga qat’iy rioya etish yuzasidan tegishli ko‘rsatmalar berildi. Shuningdek, tadbirkorlar va bozor xodimlari bilan yong‘in xavfsizligi qoidalariga rioya etish, birlamchi yong‘in o‘chirish vositalaridan foydalanish hamda favqulodda vaziyatlarda to‘g‘ri harakat qilish tartibi bo‘yicha tushuntirish ishlari olib borildi.