Samarqand viloyati Favqulodda vaziyatlar boşqarmasi

Samarqand viloyati Favqulodda vaziyatlar boshqarmasi tomonidan yong‘in va boshqa favqulodda vaziyatlarning oldini olish, ularning oqibatlarini bartaraf etish hamda qutqaruv bo‘linmalarining tezkor harakatlanish ko‘nikmalarini oshirish maqsadida maxsus-taktik o‘quv mashqi o‘tkazildi.

O‘quv mashqi Imom Buxoriy majmuasi hududida joylashgan mehmonxonalardan birida tashkil etildi.

Mashq ssenariysiga ko‘ra, mehmonxona binosida shartli yong‘in sodir bo‘ldi. Voqea joyiga FVBning yong‘in-qutqaruv bo‘linmalari jalb etilib, qisqa vaqt ichida yong‘in o‘chog‘ini aniqlash, uni bartaraf etish, binoda qolib ketgan fuqarolarni xavfsiz hududga evakuatsiya qilish hamda jabrlanganlarga birinchi yordam ko‘rsatish bo‘yicha amaliy harakatlar bajarildi.

Shuningdek, mehmonxona xodimlarining favqulodda vaziyat yuzaga kelgandagi harakatlari, xabar berish, evakuatsiyani tashkil etish va yong‘in xavfsizligi talablariga rioya etish holati amaliy jihatdan sinovdan o‘tkazildi.

O‘quv mashqi davomida qutqaruv bo‘linmalarining o‘zaro hamkorligi, maxsus texnika va jihozlardan samarali foydalanishi hamda belgilangan vazifalarni tezkor va sifatli bajarish ko‘nikmalari mustahkamlandi.