Yurtimizda 1-sentyabrdan 30-sentyabrga qadar o‘tkazilayotgan “Yong‘indan ogohlik” umummilliy kampaniyasi doirasida Samarqand viloyatining Urgut tumanida aholi xavfsizligini ta’minlash, yong‘inlar va boshqa favqulodda vaziyatlarning oldini olishga qaratilgan keng ko‘lamli profilaktik tadbirlar amalga oshirilmoqda.

Urgut tumani Favqulodda vaziyatlar bo‘limi xodimlari tomonidan bozorlar, savdo markazlari, avtomobillarga yoqilg‘i quyish shoxobchalari, tadbirkorlik subyektlari, ta’lim va tibbiyot muassasalari, qurilish obyektlari hamda aholi xonadonlarida profilaktik o‘rganishlar tashkil etilmoqda.

Tadbirlar davomida obyektlarda yong‘in xavfsizligi talablariga rioya etilishi o‘rganilib, aniqlangan kamchiliklarni bartaraf etish yuzasidan mas’ul shaxslar va fuqarolarga amaliy tavsiyalar berilmoqda.

Xususan, bozorlar va savdo markazlarida tadbirkorlar hamda sotuvchilar bilan suhbatlar o‘tkazilib, elektr tarmoqlari va jihozlaridan xavfsiz foydalanish, evakuatsiya yo‘laklarini to‘sib qo‘ymaslik, yong‘inga qarshi vositalarni shay holatda saqlash zarurligi tushuntirilmoqda. Birlamchi yong‘in o‘chirish vositalaridan foydalanish tartibi amaliy tarzda ko‘rsatib berilib, fuqarolarga tegishli eslatmalar tarqatilmoqda.

Avtomobillarga yoqilg‘i quyish shoxobchalarida esa yonuvchan va portlovchi moddalar bilan ishlashda xavfsizlik qoidalariga qat’iy rioya etish, ochiq olovdan foydalanmaslik, chekish bo‘yicha belgilangan talablarga amal qilish hamda yong‘inga qarshi vositalarning sozligini ta’minlash masalalariga alohida e’tibor qaratilmoqda.

Ta’lim va tibbiyot muassasalarida o‘tkazilayotgan tadbirlar davomida yong‘inga qarshi tizimlarning holati, evakuatsiya yo‘laklari, elektr va gaz uskunalaridan foydalanish xavfsizligi o‘rganilmoqda. Muassasa mas’ullariga yong‘in sodir bo‘lganda xodimlar va fuqarolarni xavfsiz evakuatsiya qilish, favqulodda vaziyatlarda to‘g‘ri harakatlanish hamda birlamchi yong‘in o‘chirish vositalaridan foydalanish bo‘yicha tushuntirishlar berilmoqda.

Qurilish obyektlarida ham profilaktik nazorat tadbirlari tashkil etilib, ishchilarga mehnat va yong‘in xavfsizligi qoidalariga rioya etish, gaz va elektr jihozlaridan to‘g‘ri foydalanish hamda favqulodda vaziyatlarning oldini olish bo‘yicha zarur tavsiyalar berilmoqda.

Shuningdek, mahallabay va xonadonbay tarzda olib borilayotgan targ‘ibot tadbirlari davomida fuqarolar bilan bevosita muloqot qilinib, ularga elektr va gaz jihozlaridan xavfsiz foydalanish, bolalarni nazoratsiz qoldirmaslik, yong‘in xavfsizligi qoidalariga amal qilish hamda favqulodda vaziyatlarda to‘g‘ri va tezkor harakat qilish yuzasidan tavsiyalar berilmoqda.

“Yong‘indan ogohlik” umummilliy kampaniyasi doirasidagi bunday profilaktik tadbirlar yong‘inlarning oldini olish, fuqarolarning hayoti va mol-mulkini muhofaza qilish hamda aholida xavfsizlik madaniyatini yanada yuksaltirishga xizmat qilmoqda.