Samarqand viloyati Favqulodda vaziyatlar boshqarmasi

Samarqand viloyati Favqulodda vaziyatlar boshqarmasi tomonidan “Suv havzalarida insonlarning suvga cho‘kishi bilan bog‘liq baxtsiz hodisalar va ularning oldini olish choralari” mavzusida hamkor tashkilotlar ishtirokida ko‘rgazmali o‘quv seminar tashkil etildi.

Seminarda Samarqand viloyati FVB boshlig‘i o‘rinbosari U. Axrorov mavzu yuzasidan ma’ruza qilib, suv havzalarida sodir bo‘layotgan baxtsiz hodisalarning asosiy sabablari, ularning oqibatlari hamda bunday holatlarning oldini olish bo‘yicha amalga oshirilayotgan ishlar haqida batafsil ma’lumot berdi. Shuningdek, yoz mavsumida aholi, ayniqsa yoshlar va bolalar o‘rtasida suv havzalarida xavfsiz harakatlanish qoidalariga qat’iy rioya etish muhimligi ta’kidlandi.

Tadbirda Ichki ishlar boshqarmasi, Oliy ta’lim, fan va innovatsiyalar boshqarmasi, Maktabgacha va maktab ta’limi boshqarmasi, Sog‘liqni saqlash boshqarmasi, Zarafshon irrigatsiya tizimlari havza boshqarmasi, Mahallalar uyushmasi, ommaviy axborot vositalari vakillari, jurnalistlar, blogerlar hamda boshqa hamkor tashkilotlar vakillari ishtirok etdi.
Seminarning nazariy qismida ishtirokchilar tomonidan mavzu yuzasidan qator savollar berildi.

Mutaxassislar suv havzalarida xavfsizlik qoidalariga rioya etish, favqulodda vaziyatlarda to‘g‘ri harakat qilish, cho‘kish holatlarining oldini olish hamda qutqaruv xizmatlarining faoliyati bo‘yicha berilgan savollarga batafsil javob qaytarib, zarur tavsiya va tushuntirishlar berdilar. Shuningdek, hamkor tashkilotlar vakillari ham so‘zga chiqib, suv havzalarida xavfsizlikni ta’minlash, aholi o‘rtasida profilaktik targ‘ibot ishlarini kuchaytirish hamda cho‘kish bilan bog‘liq baxtsiz hodisalarning oldini olish yuzasidan o‘z ma’ruza va takliflarini bildirdilar.

Seminarning amaliy qismida suv havzalarida xavfsizlik qoidalari, cho‘kayotgan insonni qutqarish usullari hamda jabrlanuvchiga birinchi yordam ko‘rsatish tartibi ko‘rgazmali tarzda namoyish etildi.

Mutaxassislar tomonidan cho‘kish xavfi yuzaga kelganda to‘g‘ri harakatlanish, qutqaruv vositalaridan samarali foydalanish va tezkor yordam ko‘rsatish bo‘yicha amaliy tushuntirishlar berildi. Shuningdek, qutqaruv xizmatlarida foydalaniladigan g‘avvoslik jihozlari va maxsus kiyimlari, qutqaruv halqalari, qutqaruv nimchalari, arqonlar hamda boshqa maxsus vositalarning texnik imkoniyatlari va ulardan foydalanish tartibi haqida batafsil ma’lumot berildi. Ishtirokchilar mazkur vositalarning amaliy qo‘llanilishi bilan yaqindan tanishdilar.

Tadbir yakunida suv havzalarida fuqarolar xavfsizligini ta’minlash, cho‘kish bilan bog‘liq baxtsiz hodisalarning oldini olish hamda aholi o‘rtasida xavfsizlik madaniyatini yanada yuksaltirish bo‘yicha tavsiyalar berildi. Seminar ishtirokchilar tomonidan katta qiziqish bilan kuzatildi va o‘zaro fikr almashildi.