Samarqand viloyati Favqulodda vaziyatlar boshqarmasi

Samarqand viloyati Favqulodda vaziyatlar boshqarmasi tomonidan Samarqand shahar Favqulodda vaziyatlar bo‘limining 6-qutqaruv qismi binosi majlislar zalida barcha tuman va shahar Favqulodda vaziyatlar bo‘limlarining katta haydovchilari hamda qutqaruvchi-haydovchilari ishtirokida o‘quv-metodik seminar tashkil etildi.

Tadbirning asosiy maqsadi xizmat va shaxsiy avtotransport vositalari ishtirokida sodir bo‘lishi mumkin bo‘lgan yo‘l-transport hodisalarining oldini olish, yo‘l harakati xavfsizligi qoidalariga qat’iy rioya etish, transport vositalarining texnik sozligini ta’minlash, hujjatlarni to‘g‘ri yuritish, qonunchilik talablariga amal qilish hamda xizmat intizomini mustahkamlashdan iborat bo‘ldi.

Seminarda Samarqand viloyati Favqulodda vaziyatlar boshqarmasi boshlig‘i, boshqarmaning mas’ul xodimlari hamda Ichki ishlar organlari Yo‘l harakati xavfsizligi xizmati vakili tomonidan ma’ruzalar qilinib, haydovchi-qutqaruvchilarga xizmat faoliyati davomida yo‘l harakati qoidalariga rioya etish, xizmat va transport intizomini mustahkamlash, qonunchilik talablariga qat’iy amal qilish, xizmat vazifalarini mas’uliyat bilan bajarish hamda favqulodda vaziyatlarga shaylikni ta’minlash yuzasidan zarur tavsiya va ko‘rsatmalar berildi.

Shuningdek, Favqulodda vaziyatlar vazirligining “Yong‘in o‘chirish avtomobili haydovchisini ishga olish, unga malaka darajasini va maxsus agregatdan foydalanish huquqini berish tartibi to‘g‘risida Nizomni tasdiqlash haqida”gi 427-sonli buyrug‘i talablari asosida yong‘in o‘chirish avtomobillari hamda maxsus agregatlardan foydalanish tartiblari bo‘yicha nazariy va amaliy mashg‘ulotlar o‘tkazildi.

Seminar yakunida ishtirokchilarning bilim va ko‘nikmalarini baholash maqsadida nazariy hamda amaliy sinovlar qabul qilindi. Sinovlardan muvaffaqiyatli o‘tgan haydovchi-qutqaruvchilarga yong‘in o‘chirish avtomobillari va maxsus agregatlardan foydalanish huquqini beruvchi guvohnomalar hamda tegishli malaka darajalari berildi.

Mazkur tadbir haydovchi-qutqaruvchilarning kasbiy mahoratini oshirish, xizmat samaradorligini yuksaltirish, xizmat intizomini mustahkamlash hamda favqulodda vaziyatlarga tezkor va samarali javob berish salohiyatini yanada rivojlantirishga xizmat qiladi.