20-sentyabr – Butunjahon tozalik kuni Farg‘ona tumanida nishonlandi
2025-09-22 19:10:00 / Yangiliklar
Har yili 20-sentyabr sanasida nishonlanadigan Butunjahon tozalik kuni insoniyatni yashab turgan hududda tozalik va ozodalikka intilish g‘oyasi atrofida birlashtiradi. Ushbu tashabbus dastlab 2008-yilda Estoniyada boshlangan bo‘lib, o‘sha yili 50 ming ko‘ngilli mamlakatni chiqindilardan xoli etish uchun birlashgan edi.
Joriy yilda ham mazkur xalqaro tashabbus mamlakatimizda keng nishonlanib, “Hayot uchun joy ajrating” shiori ostida millionlab ko‘ngillilarni birlashtirdi. Shu munosabat bilan Farg‘ona tumanidagi "Satkak" ziyoratgohida ham ekoaksiya erta tongdan start oldi.
Aksiya davomida ishtirokchilarga boshqarma tomonidan hududni tozalash uchun barcha zarur anjomlar — qo‘lqop, chiqindi uchun qoplar, shuningdek, Butunjahon tozalik kuni ramzi tushirilgan futbolka va kepkalar topshirildi.
Hududlarni sifatli tozalash va chiqindilarni olib chiqish uchun “Toza hudud” DUK hamda viloyatdagi sanitar tozalov korxonalarining maxsus avtotransportlari jalb etildi.