Farg‘ona tumani hokimligi

Farg‘ona tumani Ichki ishlar bo‘limida xodimlar o‘rtasida avlodlar o‘rtasidagi uzviylikni ta’minlash, boy xizmat tajribasini yosh avlodga yetkazish hamda vatanparvarlik tuyg‘usini yuksaltirish maqsadida “Uch avlod” tamoyili asosida ma’naviy-ma’rifiy uchrashuv tashkil etildi.

Unda ichki ishlar tizimida ko‘p yillar samarali mehnat qilgan faxriylar, ayni paytda xizmat qilayotgan xodimlar hamda yosh avlod vakillari ishtirok etdi.

Uchrashuv davomida ichki ishlar organlaridagi ko‘p yillik xizmat tajribasi, kasbga sadoqat, xizmat intizomi, mas’uliyat va fidoyilik kabi fazilatlar haqida fikr almashildi. Tadbirda so‘zga chiqqan faxriylar o‘zlarining boy tajribalari va hayotiy saboqlari bilan o‘rtoqlashib, yosh xodimlarga xizmat faoliyatida asqotadigan muhim tavsiya va maslahatlarini berdilar.

Shuningdek, yosh xodimlar uchun ustozlar tajribasini o‘rganish, kasbiy mahoratini oshirish va xizmat vazifalariga yanada mas’uliyat bilan yondashish muhimligi ta’kidlandi.

Tadbirda avlodlar o‘rtasidagi uzviylikni ta’minlash, ustoz-shogird an’analarini yanada mustahkamlash, ko‘p yillik xizmat tajribasini yosh xodimlarga yetkazish hamda ularni Vatanga sadoqat va yuksak mas’uliyat ruhida tarbiyalash muhim vazifalardan biri ekani qayd etildi.