Farg‘ona tumanida yoshlar bilan sayyor qabul va ochiq muloqot tashkil etildi
2026-07-18 20:35:00 / Ochiq muloqotlar
Bugun Respublika ishchi guruhi tomonidan Farg‘ona tumanida yoshlarning muammolarini o‘rganish, ularning bandligini ta’minlash, tadbirkorlik tashabbuslarini qo‘llab-quvvatlash hamda murojaatlariga amaliy yechim topish maqsadida sayyor qabul va ochiq muloqot tashkil etildi.
Ochiq muloqotda tumanning turli hududlaridan tashrif buyurgan 100 nafardan ortiq yoshlarning murojaat va takliflari tinglandi. Muloqot davomida yoshlar tomonidan bandlikni ta’minlash, kasb-hunar egallash, imtiyozli kredit va subsidiyalar olish, tadbirkorlik faoliyatini yo‘lga qo‘yish, ta’lim, uy-joy, ijtimoiy qo‘llab-quvvatlash hamda boshqa dolzarb masalalar yuzasidan murojaatlar bildirildi.
Har bir murojaat tegishli vazirlik va idoralar, mutasaddi tashkilotlar hamda mas’ul rahbarlar ishtirokida batafsil ko‘rib chiqildi.
Murojaatlarning bir qismi joyida ijobiy hal etilgan bo‘lsa, qo‘shimcha o‘rganishni talab etadigan masalalar yuzasidan aniq muddatlar belgilangan holda mas’ullarga topshiriqlar berildi.
Ta’kidlanganidek, bunday sayyor qabullar yoshlarning muammolarini bevosita joylarda o‘rganish, ularning tashabbuslarini qo‘llab-quvvatlash hamda hayotiy masalalariga amaliy yechim topishda muhim ahamiyat kasb etadi. Respublika ishchi guruhi tomonidan bu kabi ochiq muloqotlar hududlarda izchil davom ettiriladi.