Farg‘ona tumani hokimligi

Fargʻona tumani "Xurshidi tobon" mahallasida aholi o‘rtasida psixotrop va giyohvandlik vositalari savdosi hamda iste’molining oldini olish, huquqbuzarlik va jinoyatchilikka qarshi kurashish masalalariga bag‘ishlangan davra suhbati tashkil etildi.

Tadbirda Farg‘ona viloyat hokimligining Huquqni muhofaza qilish organlari faoliyati, harbiy safarbarlik va favqulodda vaziyatlar masalalari bo‘yicha guruhi rahbari Yusufjon Kamolov, Farg‘ona tumani Ichki ishlar bo‘limi boshlig‘i Murodjon Qunduzov, Farg‘ona tumani hokimi o‘rinbosari Ilhomjon Toshpo‘latov, jome masjidi imom-xatiblari, otinoyilar, mahalla yettiligi vakillari, nuroniylar hamda mahalla aholisi ishtirok etdilar.

Davra suhbati davomida giyohvandlikning jamiyat hayotiga salbiy ta’siri, uning inson salomatligi va kelajak avlod taqdiriga yetkazadigan og‘ir oqibatlari haqida batafsil tushuntirishlar berildi.

Shuningdek, psixotrop va giyohvandlik vositalari bilan bog‘liq huquqbuzarliklarning oldini olish, yoshlarni turli zararli illatlardan asrash, fuqarolar o‘rtasida huquqiy madaniyatni yuksaltirish masalalariga alohida e’tibor qaratildi.

Tadbir davomida mazkur turdagi huquqbuzarliklar uchun qonunchilikda belgilangan javobgarlik choralari yuzasidan ham tushuntirishlar berilib, jamoatchilikni hushyorlik va hamjihatlikka chaqirish bo‘yicha targ‘ibot ishlari olib borildi.