Fargʻona tumanida yaponiyalik professor ishtirokida xurmo yetishtirish boʻyicha seminar oʻtkazildi
2026-05-13 18:00:00 / Yangiliklar
Yaponiyaning Tokio Qishloq xoʻjaligi va texnologiyalari universiteti professori Yoshiko Kavabata boshchiligidagi delegatsiya Oʻzbekiston Respublikasiga tashrif buyurdi.
Tashrif davomida delegatsiya Fargʻona tumani “Xonqiz” mahalla fuqarolar yigʻinida yoʻlga qoʻyilgan “mahalla yettiligi” faoliyati bilan yaqindan tanishdi.
Shuningdek, hududdagi xurmo yetishtirishga ixtisoslashgan xonadonlar hamda tadbirkor Sh. Akbarovga ijara asosida ajratilgan 3 gektar yer maydonida tashkil etilgan xurmo bogʻi faoliyati oʻrganildi.
Tashrif doirasida “Xonqiz” mahalla fuqarolar yigʻinida xurmo yetishtirish bilan shugʻullanuvchi aholi vakillari ishtirokida oʻquv-seminar tashkil etildi. Seminar davomida professor Yoshiko Kavabataning xurmo yetishtirish, agrotexnik parvarish va hosildorlikni oshirish boʻyicha taqdimoti tinglandi.
Mazkur seminar ishtirokchilarga xalqaro tajribalarni oʻrganish, zamonaviy yondashuvlarni amaliyotga joriy etish hamda xurmo yetishtirish samaradorligini oshirish borasida muhim tavsiyalar berdi.