Farg‘ona tumanida pillachilik orqali ijtimoiy qo‘llab-quvvatlashga qaratilgan yangi tashabbus yo‘lga qo‘yildi
2026-04-25 21:05:00 / Yangiliklar
O‘zbekiston Respublikasi Prezidentining 2026-yil 6-martdagi PQ-87-son qarori ijrosini ta’minlash maqsadida Farg‘ona tumanining “Log‘on” mahalla fuqarolar yig‘inida innovatsion yondashuv asosida yangi tashabbus amalga oshirilmoqda.
Mahalla hokim yordamchisi tashabbusi bilan yettilik xodimlari hamkorligida mahalla fuqarolar yig‘ini binosidagi bo‘sh turgan omborxonalar samarali foydalanishga jalb etilib, shartnoma asosida 2 quti ipak qurti olib kelinib parvarishlash ishlari yo‘lga qo‘yildi. Ushbu tashabbus mavjud imkoniyatlardan oqilona foydalanish orqali qo‘shimcha daromad manbalarini yaratishga qaratilgan.
Mazkur faoliyatdan olinadigan daromad hududdagi aholiga namuna bo‘lishi bilan birga, kambag‘al oilalarni qo‘llab-quvvatlash, ularni oziq-ovqat mahsulotlari bilan ta’minlash hamda ijtimoiy yordam ko‘rsatish maqsadida yo‘naltirilishi rejalashtirilgan.
Ta’kidlash joizki, ushbu loyiha mahalla darajasida ilgari surilgan yangi va samarali tashabbuslardan biri bo‘lib, uning amaliy ijrosini ta’minlashda tuman hokimligi, hudud imomlari, oqsoqollar, otinoyilar hamda tegishli tashkilotlar rahbarlari tomonidan zarur ko‘mak va amaliy yordam ko‘rsatilmoqda.