Farg‘ona tumani hokimligi

Farg‘ona tumanida suv resurslaridan samarali foydalanish, qishloq xo‘jaligi ishlab chiqarishini barqaror rivojlantirish hamda sug‘orish tizimlarini modernizatsiya qilish borasida muhim investitsion loyiha muvaffaqiyatli amalga oshirildi.

Xususan, tumanning “Birdamlik” mahalla fuqarolar yig‘ini hududida “Farg‘ona vodiysi suv resurslarini boshqarish. Faza-2” loyihasi doirasida Xitoyning “China Nuclear Industry 22nd Construction Co. LTD” kompaniyasi tomonidan qariyb 30 million AQSh dollari miqdoridagi investitsiya mablag‘lari hisobidan 2025–2026-yillar davomida “Avval-Log‘on” nasos stansiyasi qurib bitkazildi.

Mazkur inshootning tantanali ochilish marosimi keng jamoatchilik ishtirokida o‘tkazildi. Tadbirda Farg‘ona viloyati hokimining qishloq va suv xo‘jaligi masalalari bo‘yicha o‘rinbosari Alibek Tursunov, “Sirdaryo–So‘x” irrigatsiya tizimlari havza boshqarmasi boshlig‘i Faxriddin Tursunov, viloyat Nasos stansiyalaridan foydalanish boshqarmasi boshlig‘i Alohiddin Muqimjonov, Farg‘ona tumani hokimi Xamidullo Inomov, mutasaddi tashkilotlar rahbarlari, mahalla faollari hamda nuroniylar ishtirok etdi.

Texnik jihatdan zamonaviy talablarga to‘liq javob beradigan ushbu nasos stansiyasida quvvati 2000 kVt bo‘lgan 3 dona ASP350-780R.6 rusumidagi agregatlar o‘rnatilgan bo‘lib, ular orqali 9,3 kilometr masofaga 1200 millimetr diametrli quvurlar orqali soniyasiga 0,670 kub/metr hajmda suv yetkazib berish imkoniyati yaratilgan. Stansiyaning foydali ish koeffitsiyenti 85–90 foizni tashkil etadi.

Shuningdek, stansiya “Marg‘ilonsoy” kanalidan suv qabul qilib, uni “Log‘on” kanaliga yetkazib beradi. Suv uzatish quvvati soniyasiga 2 kub metrni tashkil etib, mazkur loyiha orqali qariyb 4754 gektar ekin yer maydonlarining suv ta’minoti sezilarli darajada yaxshilanadi.

Tadbir davomida ishtirokchilar yangi nasos stansiyasi imkoniyatlari, zamonaviy texnik uskunalar va avtomatlashtirilgan boshqaruv tizimi bilan yaqindan tanishdilar.