Farg‘ona tumanida limonchilikni rivojlantirishga qaratilgan seminar-trening o‘tkazildi
2026-04-20 17:30:00 / Yangiliklar
Farg‘ona tumanida qishloq xo‘jaligini diversifikatsiya qilish, yuqori daromadli yo‘nalishlarni kengaytirish hamda zamonaviy agrotexnologiyalarni joriy etish borasida tizimli ishlar amalga oshirilmoqda. Shu maqsadda “TuronBank” ATB tashabbusi hamda Farg‘ona tumani hokimligi hamkorligida limonchilikni rivojlantirishga qaratilgan seminar-trening tashkil etildi.
Mazkur tadbir Farg‘ona tumani Novkent mahalla fuqarolar yig‘ini hududida joylashgan issiqxonada o‘tkazilib, unda soha bilan shug‘ullanayotgan dehqon va tadbirkorlar faol ishtirok etdi.
Seminar davomida tajribali agronom Mashrabxo‘ja Jo‘rayev tomonidan limon yetishtirishda samarali agrotexnik tadbirlar, o‘g‘itlash tizimi, kasallik va zararkunandalarga qarshi kurashish bo‘yicha muhim tavsiyalar berildi. Shuningdek, limonchilikda yuqori hosildorlikka erishish va sifatli mahsulot yetishtirishning zamonaviy usullari atroflicha tushuntirildi.
Tadbir ishtirokchilari o‘zlarini qiziqtirgan savollarga batafsil javoblar olib, amaliy tajribalar bilan yaqindan tanishish imkoniga ega bo‘ldilar.