Farg‘onada yangi investitsion loyiha aholi bandligi va eksport salohiyatini oshirishga xizmat qiladi
2026-04-18 13:20:00 / Yangiliklar
Farg‘ona tumanida hudud iqtisodiyotini rivojlantirish va investitsiyalarni keng jalb etish borasida olib borilayotgan ishlar izchil davom etmoqda. Xususan, tuman hokimi Xamidullo Inomov hamda Turkiyaning “Heyal holding” kompaniyasi ta’sischisi Vahdettin Heyal o‘rtasida o‘tkazilgan muloqotda istiqbolli loyihalar muhokama qilindi.
Uchrashuv davomida parranda yetishtirish va uni qayta ishlash, shuningdek, zamonaviy agrosanoat kooperativlarini tashkil etish masalalari ko‘rib chiqildi.
Mazkur tashabbuslar qishloq xo‘jaligi sohasida yuqori qo‘shimcha qiymat yaratish, ishlab chiqarish samaradorligini oshirish va ilg‘or texnologiyalarni joriy etish, aholi bandligini ta’minlash, oziq-ovqat xavfsizligini mustahkamlash, parranda go‘shti yetishtirish hajmini oshirish hamda eksport imkoniyatlarini kengaytirishga qaratilgani bilan ahamiyatlidir.
Uchrashuv yakunida tomonlar o‘rtasida mazkur loyiha doirasida hamkorlik memorandumi hamda uni bosqichma-bosqich amalga oshirishga kelishib olindi.