Xorijiy investorlar bilan hamkorlikni kengaytirish masalalari muhokama qilindi
2026-02-10 20:05:00 / Yangiliklar
Farg‘ona tumani hokimi Xamidullo Inomov Turkiya Respublikasidan tashrif buyurgan investorlar — Turkiyaning “GENGROUP Sunum” xususiy korxonasi ta’sischilari Ali Karabacili, Salih Demir hamda Cemalettin Bulbullar bilan rasmiy uchrashuv o‘tkazdi.
Uchrashuv davomida Farg‘ona tumanida investitsiya muhitini yanada yaxshilash, xorijiy sarmoyalarni jalb etish hamda ikki tomonlama iqtisodiy hamkorlikni kengaytirish masalalari atroflicha muhokama qilindi. Xususan, turizm sohasini rivojlantirish, eksport va import hajmlarini oshirish, shuningdek, hududda rejalashtirilayotgan qurilish loyihalarini amalga oshirish bo‘yicha bir qator istiqbolli tashabbuslar ko‘rib chiqildi.
Tomonlar o‘zaro manfaatli loyihalarni hayotga tatbiq etish orqali hududning ijtimoiy-iqtisodiy salohiyatini oshirish, yangi ish o‘rinlari yaratish hamda zamonaviy infratuzilmani rivojlantirishga alohida e’tibor qaratdilar. Uchrashuv yakunida kelgusida hamkorlikni izchil davom ettirish, aniq loyihalar bo‘yicha amaliy ishlarni boshlash yuzasidan kelishuvlarga erishildi.