Farg‘ona tumani hokimligi

Farg‘ona tumani hokimligi binosida Farg‘ona viloyati hokimining birinchi o‘rinbosari Mirzoxid Ubaydullayev, Raqobatni rivojlantirish va iste’molchilar huquqlarini himoya qilish boshqarmasi boshlig‘i o‘rinbosari Nodirbek Yusupov hamda Farg‘ona tumani hokimi Xamidullo Inomovlar boshchiligida muhim ishchi yig‘ilish bo‘lib o‘tdi.

Yig‘ilishda tuman hokimi o‘rinbosarlari, korxona va tashkilotlar rahbarlari, 1-hudud toifasiga kiruvchi og‘ir toifadagi mahallalar raislari hamda hokim yordamchilari ishtirok etdilar. Unda mazkur mahallalarning ijtimoiy-iqtisodiy rivojlanishini ta’minlash, aholi turmush sharoitini yaxshilash borasida amalga oshirilayotgan ishlar atroflicha tahlil qilindi.

Muhokama davomida 1-hudud toifasiga kiruvchi, og‘ir toifadagi mahallalarga biriktirilgan korxona va tashkilotlar rahbarlari ishtirokida olib borilayotgan amaliy ishlar ko‘rib chiqildi. Shuningdek, mavjud muammolar, ularni bartaraf etish bo‘yicha belgilangan chora-tadbirlar hamda kelgusidagi ustuvor vazifalar yuzasidan aniq topshiriqlar berildi.

Bundan tashqari, mahallalarda obodonlashtirish ishlarini yanada faollashtirish, hududlarda sanitariya holatini yaxshilash maqsadida haftaning har shanba kuni tuman bo‘ylab hasharlarini tashkil etish masalalari muhokama qilinib, ushbu yo‘nalishda mas’ullarga tegishli vazifalar yuklatildi.