Giyohvandlik va narkojinoyatlarga qarshi kurashishda tizimli choralar kuchaytirilmoqda
2026-02-09 16:30:00 / Yangiliklar
O‘zbekiston Respublikasi Prezidentining 2025-yil 3-noyabrdagi PF-207-son Farmoni bilan tasdiqlangan “Giyohvandlik va narkojinoyatlarning barvaqt oldini olish hamda ularga qarshi kurashish bo‘yicha 2025–2026-yillarga mo‘ljallangan kompleks amaliy harakatlar milliy dasturi” ijrosini ta’minlash maqsadida Farg‘ona tumanida izchil va manzilli tadbirlar amalga oshirilmoqda.
Mazkur dastur doirasida Farg‘ona tumani “Yuqori Vodil”, “Obod” va “Navro‘z” mahalla fuqarolar yig‘inlari aholisi uchun 3-umumiy o‘rta ta’lim maktabida davra suhbati tashkil etildi. Tadbirda mahalla faollari, ta’lim muassasasi vakillari, ota-onalar hamda yoshlar ishtirok etib, giyohvandlik va boshqa salbiy illatlarning oldini olish masalalari atroflicha muhokama qilindi.
Yig‘ilish davomida yoshlar orasida sog‘lom turmush tarzini keng targ‘ib etish, ularni turli xatar va zararli odatlardan asrash, bo‘sh vaqtini mazmunli tashkil etish bo‘yicha ustuvor vazifalar belgilab olindi. Shuningdek, mazkur yo‘nalishda ota-onalar, pedagoglar va mahalla hamkorligini yanada mustahkamlash zarurligi alohida ta’kidlandi.
Tadbir yakunida ishtirokchilarga giyohvandlikning og‘ir oqibatlari va uning jamiyat hayotiga salbiy ta’sirini ochib beruvchi “Badal” badiiy filmi namoyish etildi. Film orqali yoshlar ongida hushyorlikni kuchaytirish hamda to‘g‘ri hayotiy tanlov qilishga undash maqsad qilindi.