Farg‘ona tumanida “Anvar Xoji ota” mahalla markazi foydalanishga topshirildi
2025-12-18 09:05:00 / Yangiliklar
Farg‘ona tumani “Oqtom” mahalla fuqarolar yig‘ini hududida tadbirkor Ranjidaxon Abduvaliyeva tashabbusi bilan “Anvar Xoji ota” nomli mahalla markazi qurilib, foydalanishga topshirildi. Mazkur mahalla guzari tadbirkorning shaxsiy mablag‘lari hisobidan barpo etilib, mahalla infratuzilmasini yanada rivojlantirishga xizmat qilmoqda.
Mahalla markazida ayollar uchun fitnes klubi, xorijiy tillarni o‘rganish hamda pazandachilik yo‘nalishlarida to‘garaklar tashkil etilgan bo‘lib, ular hozirda faoliyat olib bormoqda. Ushbu markaz orqali hozirga qadar 4 nafar mahalla ayollarining bandligi ta’minlandi.
Mahalla markazining tantanali ochilish marosimida Farg‘ona tuman hokimi o‘rinbosari — Oila va xotin-qizlar bo‘limi boshlig‘i Xamidaxon Abduganiyeva, mahalla faollari, nuroniylar hamda mahalla yoshlari ishtirok etdilar.
Tadbir davomida so‘zga chiqqanlar mahallada xotin-qizlar va yoshlarning bandligini ta’minlash, ularning kasb-hunar o‘rganishi va ijtimoiy faolligini oshirish yo‘lida amalga oshirilgan ushbu ezgu tashabbus uchun tadbirkorga minnatdorchilik bildirdilar.