Farg‘ona tumani hokimi Xamidullo Inomovning tuman Mudofaa bo‘limi binosining ochilish marosimidagi tabrik so‘zi
2026-01-14 17:00:00 / Rahbariyatning bayonotlari va nutqlari
Assalomu alaykum, hurmatli Vatan himoyachilari soha faxriylari va bugungi tadbir ishtirokchilari!
Avvalo, siz azizlarni 14-yanvar — Vatan himoyachilari bayrami bilan chin qalbimdan ko‘p millatli tumanimiz aholisi nomidan tabriklayman. Qolaversa, bugungi bayram kunida tuman Mudofaa bo‘limining yangi foydalanishga topshirilayotgan binosining ochilish marosimida sizlar bilan uchrashib turganimdan behad mamnunman!
Ushbu qutlug‘ ayyom kunlarida o‘z hayotini Vatan himoyasidek ulug‘ ishga bag‘ishlagan azmu shijoatli harbiylarimizni sharaflab, xalqimiz va mamlakatimiz tinchligi hamda xavfsizligi yo‘lidagi xizmatlaringiz uchun barchangizga chuqur minnatdorlik bildiraman.
Aziz do‘stlar!
Bugungi tinch va osuda kunlarga yetib kelishimizda, albatta, Vatan himoyachilarining xizmatlari beqiyosdir. Tumanimizda biz bilan birga yashab, Ikkinchi jahon urushi yillarida front ortida xizmat qilgan 35 nafar, Afg‘onistonda olib borilgan jangovar harakatlarda qatnashgan 258 nafar, Chernobil voqealarida ishtirok etgan 29 nafar hamqishloqlarimiz Vatanimiz sarhadlarini ko‘z qorachig‘idek asragan.
Shuningdek, jonajon Vatanimiz sarhadlarini qo‘riqlashdek mas’uliyatli vazifani ado etish chog‘ida jonini fido qilgan tumanimiz o‘g‘lonlaridan Elmurodjon Abdulqosimov, Islombek O‘rinboyev kabi mard va jasur yigitlarimizning ko‘rsatgan xizmatlari hamisha e’tirofga loyiqdir. Biz bu jasoratli harbiylarimizni doimo faxr va g‘urur bilan yodga olamiz hamda yosh avlodni vatanparvarlik ruhida tarbiyalashda ularga ibrat sifatida ko‘rsatamiz.
Hurmatli mehmonlar!
Kuni kecha muhtaram Prezidentimiz tomonidan tinchlik va xavfsizlik masalalariga bag‘ishlangan kengaytirilgan yig‘ilishda yurtimizda mudofaa yo‘nalishida bajarilishi lozim bo‘lgan bir qator vazifalar belgilab berildi. Sohada faoliyat yuritayotgan harbiy xizmatchilarga bir qator imtiyozlar berilishi ta’kidlandi. Jumladan, harbiy xizmatchilarning oylik ish haqlari joriy yilda 20 foizga, kelgusi yilda esa 50 foizga oshirilishi belgilandi. Muddatli harbiy xizmatni o‘tagan yoshlar uchun oliy ta’lim muassasalariga kirishda va keyinchalik ularni iqtisodiy qo‘llab-quvvatlashda ham qator imtiyozlar berilishi qayd etildi.
Ushbu yig‘ilishda davlatimiz rahbari shunday dedi:
“Bir narsani tushunib olish zarur. Zamonaviy urush tabiati tubdan o‘zgardi. Endi qaysi davlat faqat tank, samolyot yoki askarlar soniga tayanib g‘alaba qozonaman desa, qattiq adashadi. Hozirgi janglar sun’iy intellekt, raqamli boshqaruv, uzoq masofaga yuqori aniqlikda zarba beruvchi vositalar, kiber va robot texnologiyalar hamda siyosiy-iqtisodiy bosim asosida olib borilmoqda”.
Shu bois, tinchlik va hotirjamlik eng qimmat boylikka aylanayotganini bir daqiqa ham unutmasligimiz lozimligi alohida ta’kidlandi.
Aziz tadbir qatnashchilari!
Mamlakatimizda bayram shukuhi hukm surayotgan ushbu pallada tuman Mudofaa bo‘limi binosini ta’mirlash uchun 2 milliard 454 million so‘m mablag‘ ajratilib, harbiy xizmatga chaqiriluvchilar va xizmat vazifasini olib boruvchi xodimlar uchun zamonaviy jihozlar bilan ta’minlangan barcha shart-sharoitlar yaratildi. Ushbu binoni bugungi bayram arafasida foydalanishga topshirar ekanmiz, faoliyatingizda Vatanimiz tinchligi va farovonligi yo‘lida sidqidildan mehnat qilishingizga ishonamiz.
Qadrli Vatan himoyachilari!
Sizlarni ushbu qutlug‘ bayram bilan yana bir bor samimiy tabriklab, barchangizga mustahkam sog‘liq, oilaviy baxt hamda olijanob va mas’uliyatli faoliyatingizda ulkan zafarlar tilayman.
E’tiboringiz uchun rahmat!