Qoraqalpog`iston Rеspublikаsi Ellikqal'a tumani hokimligi

Yo‘l harakati xavfsizligi tizimi takomillashtirilishi munosabati bilan qonunchilikka kiritilgan o‘zgartirish va qo‘shimchalar

Keyingi yillarda mamlakatimizda yo‘l harakati qoidalarini takomillashtirish, yo‘l-transport hodisalarining oldini olish hamda harakat xavfsizligini ta’minlash borasida tizimli ishlar amalga oshirilmoqda.

Xususan, O‘zbekiston Respublikasining 2025-yil 20-fevraldagi O‘RQ-1033-son Qonuni bilan ayrim qonun hujjatlariga, jumladan, Ma’muriy javobgarlik to‘g‘risidagi kodeksga yo‘l harakati xavfsizligini ta’minlashga qaratilgan qator o‘zgartirish va qo‘shimchalar kiritildi.

Mazkur qonun bilan yo‘l harakati qoidalarini qo‘pol ravishda buzgan shaxslarga nisbatan javobgarlikni kuchaytirish, transport vositasini boshqarish huquqidan mahrum etilgan shaxslarning transport vositasini takroran boshqarishi uchun jinoiy javobgarlik belgilash hamda jarima ballari tizimini joriy etish nazarda tutilgan.

Jumladan, Ma’muriy javobgarlik to‘g‘risidagi kodeks 341-modda bilan to‘ldirildi.

Ushbu moddaga ko‘ra, yo‘l harakati qoidabuzarliklari bo‘yicha hisoblanadigan jarima ballari belgilangan miqdordan oshgan taqdirda ma’muriy jazo qo‘llaniladi.

Yo‘l harakati qoidalarining ayrim moddalarida nazarda tutilgan huquqbuzarliklar sodir etilganda, transport vositasi haydovchisiga asosiy jazo bilan birga jarima ballari ham hisoblanadi. Bunda har bir huquqbuzarlik uchun hisoblanadigan jarima ballari ikki balldan oshmasligi kerak.

Jarima ballari huquqbuzarlik birinchi marta sodir etilgan kundan boshlab bir yil davomida hisoblab boriladi. Mazkur muddat tugagach, hisoblangan ballar avtomatlashtirilgan tarzda bekor qilinadi.

Agar haydovchining bir yil davomida hisoblangan jarima ballari 12 balldan oshsa, oxirgi sodir etilgan huquqbuzarlik uchun qo‘shimcha jazo tariqasida transport vositalarini boshqarish huquqidan mahrum etiladi. Bunda huquqdan mahrum qilish muddati olti oydan kam bo‘lmasligi lozim.

Jarima ballari belgilangan miqdordan oshganligi uchun ma’muriy jazo jinoyat ishlari bo‘yicha tuman (shahar) sudi tomonidan qo‘llaniladi.

Haydovchilarga nisbatan jarima ballarini hisoblash tartibi O‘zbekiston Respublikasi Vazirlar Mahkamasi tomonidan belgilanadi.

Mazkur qonun yo‘l harakati ishtirokchilarining qoidalarga qat’iy rioya etishini ta’minlash, haydovchilik madaniyatini oshirish hamda og‘ir oqibatli yo‘l-transport hodisalarining oldini olishga xizmat qiladi.

Jinoyat ishlari bo‘yicha Ellikqal’a tuman sudining tergov sudyasi
Seytanov Azat Ismaylovich