Qoraqalpog`iston Rеspublikаsi Ellikqal'a tumani hokimligi

 Giyohvandlik va voyaga yetmaganlarni zararli odatlarga jalb etishga qarshi qonunchilik kuchaytirildi

O‘zbekiston Respublikasining 2026-yil 11-iyundagi O‘RQ–1151-son Qonuni bilan Ma’muriy javobgarlik to‘g‘risidagi kodeksga jamoat xavfsizligini ta’minlash hamda yoshlarni zararli illatlardan asrashga qaratilgan muhim o‘zgartirish va qo‘shimchalar kiritildi.

Jumladan, Kodeks 187¹-modda bilan to‘ldirilib, jamoat joylarida giyohvandlik vositalari, psixotrop moddalar yoki ularning analoglari, shuningdek kuchli ta’sir qiluvchi moddalarni iste’mol qilgan shaxslarga nisbatan ma’muriy javobgarlik belgilandi. Bunday huquqbuzarlikni sodir etgan shaxslarga huquqbuzarlik ashyolari musodara qilingan holda bazaviy hisoblash miqdorining 20 baravaridan 40 baravarigacha, mansabdor shaxslarga esa 40 baravaridan 60 baravarigacha miqdorda jarima solinishi yoki 15 sutkagacha ma’muriy qamoq jazosi qo‘llanilishi mumkin.

Shuningdek, Kodeksning 188-moddasi yangi tahrirda bayon etildi. Endilikda voyaga yetmaganlarni spirtli ichimliklar, giyohvandlik vositalari, psixotrop moddalar yoki insonning aql-idroki va irodasiga salbiy ta’sir ko‘rsatuvchi boshqa moddalarni iste’mol qilishga jalb etgan shaxslar 15 sutkagacha ma’muriy qamoqqa olinishi, ma’muriy qamoq qo‘llanilishi mumkin bo‘lmagan shaxslarga esa bazaviy hisoblash miqdorining 20 baravaridan 30 baravarigacha miqdorda jarima qo‘llanilishi belgilandi.

Mazkur Qonun 2026-yil 12-iyundan e’tiboran kuchga kirdi.

Ushbu o‘zgartirishlar jamiyatda sog‘lom turmush tarzini qaror toptirish, jamoat tartibini mustahkamlash hamda voyaga yetmaganlarni zararli odatlardan himoya qilishga xizmat qiladi.

Jinoyat ishlari bo‘yicha Ellikqal’a tuman sudi
Tergov sudyasi
Azat Ismaylovich Seytanov