O‘zbekiston-Malayziya birinchi ta’lim forumi o‘tkazildi
2025-02-04 15:05:00 / Vazirlik yangiliklari
O‘zbekiston va Malayziya ta’lim, ilm-fan sohasidagi hamkorlikni yanada mustahkamlab, birgalikdagi harakatlarning yangi marralarini kashf etmoqda. Hozirgacha ikki davlat oliygohlari o‘rtasida 94 ta bitim va shartnomalar amalda. Yurtimiz talabalari uchun tahsil olish imkoniyatlari kengayib, bugungi kunda 500 nafarga yaqin yigit-qizlarimiz Malayziyada ilm o‘rganyapti. O‘zaro hamkorlikda 5 ta bakalavriat ta’lim yo‘nalishi va 3 ta magistratura mutaxassisligi bo‘yicha qo‘shma ta’lim dasturlari amalga oshirmoqda.
“Barqaror rivojlanish maqsadlariga erishishda oliy ta’lim sohasidagi imkoniyatlar va tashabbuslar” mavzusida Birinchi O‘zbekiston-Malayziya ta’lim forumi hamkorlik loyihalarini bundanda kengaytirish uchun muhim platforma bo‘ldi. Yirik anjumanni ikki davlat oliy ta’lim vazirlari ochib berishdi.
Forum O‘zbekiston va Malayziya oliy ta’lim muassasalari vakillari, ilmiy tadqiqotchilar hamda xalqaro ekspertlar ishtirokidagi sessiyalar bilan davom etdi. Unda talabalar va professor-o‘qituvchilar almashinuvini yo‘lga qo‘yish, qo‘shma dasturlarni amalga oshirish va ilmiy hamkorlikni kuchaytirishga qaratilgan qator tashabbuslar muhokama qilindi.
Shuningdek, anjuman doirasida O‘zbekiston va Malayziya universitetlari o‘rtasida 50 dan ortiq yaqin hamkorlik shartnomasi imzolandi. Masalan, erishilgan shartnomalarga ko‘ra:
• Toshkent davlat iqtisodiyot universiteti va Mara texnologiya universiteti hamkorligida “Kambag‘allikni qisqartirish va Inklyuziv ta’lim markazi” tashkil etiladi.
• Toshkent axborot texnologiyalari universiteti va “Heriot-Watt” universiteti hamkorligida R&D ilmiy-tadqiqot markazi ochiladi
• Jizzax politexnika universiteti va INTI xalqaro universiteti hamkorligida “Ilmiy va akademik qo‘shma markaz” tashkil etiladi.
• Buxoro muhandislik-texnologiya instituti va Petronas universiteti bilan hamkorlikda “Sun’iy intellekt ilmiy-tadqiqot laboratoriyasi” yaratiladi.
Bundan tashqari, O‘zbekiston Respublikasi Oliy ta’lim kengashi va Sulton Idris nomidagi pedagogika universiteti o‘rtasida Konsorsium tashkil etish to‘g‘risida Anglashuv memorandumi imzolandi.
Shuningdek, O‘zbekiston xalqaro islom akadmiyasi ham Malayziya islom ilmlari universiteti bilan anglashuv memorandumi imzolandi. Unga muvofiq, ikki ta’lim muassasasi o‘rtasida talabalar almashinuvi yo‘lga qo‘yiladi. Professor-o‘qituvchilarning innovatsion xorijiy tarjiba asosida o‘zaro malaka oshirishi va stajirovkalari tashkil etiladi.
Anjuman doirasida turli masalalarni qamrab olgan panel sessiyalar, nufuzli oliy ta’lim muassasalariga tashrif, B2B formatidagi uchrashuvlar va OAV uchun brifing singari tadbirlar ham bo‘lib o‘tdi.
Ikki davlat oliy ta’limi va ilm-fan sohasidagi bu do‘stona hamkorlik kelajak avlod ta’lim-tarbiyasida, xalqaro maydondagi muvaffaqiyatlarda, umuman tarmoqlar rivojida real natijalarini namoyon etadi.