Ilg‘or muhandislik maktablarini tashkil etishda Rossiya tajribasi o‘rganildi
2024-12-27 16:00:00 / Vazirlik yangiliklari
Safar davomida muhandislik sohasida Rossiyaning ilg‘or oliy ta’lim muassasalari – N. E. Bauman nomidagi Moskva davlat texnika universiteti, D.I.Mendeleyev nomidagi Rossiya kimyo-texnologiya universiteti va “MIFI” milliy tadqiqot yadro universitetiga tashrif buyurildi va O‘zbekiston delegatsiyasi uchun ushbu universitetlar bo‘ylab batafsil tanishuv ekskursiyalari tashkil etildi, ikki tomon oliy ta’lim vazirliklari o‘rtasida rasmiy muzokaralar o‘tkazildi.
Xususan, N. E. Bauman nomidagi Moskva davlat texnika universiteti huzurida 2022-yilda tashkil qilingan “Raketa-kosmik sohada tizimli injeneriya” nomli ilg‘or muhandislik maktabiga tashrif davomida uning faoliyati yo‘nalishlari, sanoat hamkorlari bilan ishlash jarayoni va erishilgan yutuqlar namoyish etildi. Ilg‘or muhandislik maktabi uchun yaratilgan ilmiy-o‘quv laboratoriyalari o‘rganildi. Universitet bilan tanishuv davomida O‘zbekiston delegatsiyasiga rektor M. Gordin, Rossiya fan va oliy ta’lim vaziri o‘rinbosari A. Omelchuk va Rossiya Federatsiyasi Hukumati devoni mas’ul xodimlari hamrohlik qildilar.
N. E. Bauman nomidagi Moskva davlat texnika universiteti (MDTU) rektori M. Gordin “MDTUning kelgusida O‘zbekistonda tashkil qilinadigan filiali ikki mamlakat ehtiyoji uchun xizmat qilishi lozim”ligiga hamda filialda ham ta’lim va ilmiy loyihalar sifati yuqori darajada bo‘lishini ta’minlash muhim ekanligiga urg‘u berdi.
O‘zbekiston vakillari D.I.Mendeleyev nomidagi Rossiya kimyo-texnologiya universiteti va “MIFI” milliy tadqiqot yadro universitetining bo‘linmalarida amalga oshirilayotgan loyihalarni o‘rgandilar hamda ularni O‘zbekistonda ham yo‘lga qo‘yish imkoniyati to‘g‘risida fikr almashdilar.
Safar davomida oliy ta’lim, fan va innovatsiyalar vaziri o‘rinbosari O.Mahkamov Rossiya Federatsiyasi Fan va oliy ta’lim vaziri o‘rinbosari K.Mogilevskiy bilan alohida muzokara o‘tkazdi. Uchrashuvda tomonlar O‘zbekistondagi Rossiya oliygohlarining faoliyatini yanada takomillashtirish, xususan, muhandislik-texnika sohalariga ixtisoslashgan filiallarda respublika iqtisodiyoti uchun muhim yo‘nalishlarda ilg‘or muhandislik maktablarini yaratishda hamkorlik qilishga va ushbu loyihalarga Rossiya tomonidan yirik sanoat hamkorlarini jalb qilib borishga kelishdilar.
Suhbat davomida rasmiylar, shuningdek, 2025-yilda qo‘shma ilmiy loyihalar tanlovini o‘tkazish va shu orqali ikki mamlakat olimlari hamkorlikda ishlab chiqqan dolzarb ilmiy loyihalarni tanlov asosida birgalikda moliyalashtirish bo‘yicha kelishuvga erishdilar.