O‘zbekiston Respublikasi Oliy taʼlim, fan va innovatsiyalar vazirligi

2024-yilda mamlakatimizda yoshlarning ta’lim olishi, ilm-fan bilan shug‘ullanishi hamda innovatsion g‘oyalarni amalga oshirishi uchun yanada keng imkoniyatlar yaratish yo‘lida qator ishlar amalga oshirildi.

Hozirda respublikamizda 208 ta oliy ta’lim tashkiloti faoliyat yuritib, talabalar soni 1 mln 400 ming nafardan ortdi.

Ta’lim yo‘nalishlarini optimallashtirish maqsadida mazmun jihatidan yaqin bo‘lgan bakalavriat ta’lim yo‘nalishlari 40 foizgacha maqbullashtirildi. 183 ta ta’lim yo‘nalishi va 546 ta mutaxassislik bo‘yicha malaka talablari, 1 278 ta o‘quv reja va 4 mingdan ortiq o‘quv dasturlari tasdiqlandi.

Bundan tashqari, 7 ta oliygohdagi 39 ta ta’lim dasturlari xalqaro akkreditatsiyadan o‘tkazildi. Shu bilan birga, Top-500 ga kirgan 9 ta xorijiy oliygoh bilan hamkorlikda 15 ta qo‘shma ta’lim dasturi tashkil etildi.

Nufuzli “QS” xalqaro reytingida 2 ta oliygohimiz – “Toshkent irrigatsiya va qishloq xo‘jaligini mexanizatsiyalash muhandislari instituti” milliy tadqiqot universiteti va O‘zbekiston milliy universiteti TOP-1000 talik ro‘yxatdan o‘rin oldi.

Bundan tashqari, Times Higher Education xalqaro reyting tashkilotining World University Rankings-2025 TOP-1000 oliy ta’lim tashkilotlari ro‘yxatida 3 ta oliygohimiz – “Toshkent irrigatsiya va qishloq xo‘jaligini mexanizatsiyalash muhandislari instituti” MTU, O‘zbekiston milliy universiteti, Toshkent axborot texnologiyalari universiteti TOP 1000 universitetlar qatoridan joy oldi. Bundan tashqari, 48 ta oliygoh reportyor maqomiga ega bo‘ldi.

Xorijiy tajribalarni o‘quv jarayoniga jalb qilish ham muhim yo‘nalishlardan biri bo‘lib, 4 970 nafar professor-o‘qituvchi xorijda malaka oshirdi, 2 510 nafar xorijiy professor-o‘qituvchi o‘quv jarayoniga jalb etildi.

Shuningdek, kasbiy ta’lim muassasalariga 169 195 nafar yoshlar qabul qilindi. 14 673 nafar ishsiz fuqarolar 38 ta kasbga o‘qitildi.

418 ta kasbiy ta’lim tashkilotida 7 677 ta korxona bilan 30,8 ming nafar o‘quvchi 114 ta kasb bo‘yicha dual ta’limga jalb etildi.

90 ta mutaxassislik bo‘yicha barcha texnikumlarda kredit-modul tizimi joriy etildi. 17 ta kasb bo‘yicha 4 ta davlatning xalqaro ta’lim dasturlari amaliyotga joriy etildi.

Umumkasbiy va maxsus fanlardan 158 nomda 138 178 nusxadagi yangi o‘quv qo‘llanmalar nashr etilib, kasbiy ta’lim muassasalariga yetkazildi. Umumta’lim maktablari o‘quvchilari uchun 58 ta kasb uchun o‘quv dasturlari ishlab chiqildi.

Oliy ta’limdan keyingi ta’lim institutlariga qabul kvotalari soni 5 200 ga yetkazildi. Natijada, jami ilmiy izlanuvchilar soni 22 180 nafarni tashkil etdi, 3 954 nafar tadqiqotchi ilmiy darajalarga ega bo‘ldi.

Ilmiy faoliyatga oid dasturlar doirasida 161,5 mlrd so‘mlik 291 ta yangi loyiha moliyalashtirildi.

Ilmiy tadqiqot institutlarining moddiy-texnik bazasini tubdan yangilab borish maqsadida 85 mlrd so‘mlik 44 ta ilmiy laboratoriya asbob-uskunalari xarid qilindi. Yosh olimlarni qo‘llab-quvvatlash maqsadida 277 nafar yosh olimlar va tadqiqotchilar xorijiy ilmiy tashkilotlarga ilmiy stajirovkaga yuborildi va ushbu maqsad uchun jami 21 mlrd so‘m yo‘naltirildi.

Hududlarda 4 ta innovatsion faoliyat infratuzilma subyektlari tashkil etilib, ularning umumiy soni 55 taga yetkazildi.

Oliygohlarda 27 364 o‘rinli talabalar turar joyi va 10 500 o‘rinli o‘quv binolari yaratildi.

Davlat oliy ta’lim muassasalarining barcha bosqich talabalarini yotoqxonalarga joylashtirish to‘liq raqamlashtirildi.

Yashil makon” umummilliy loyihasi doirasida respublikamizdagi 200 ta davlat, xorijiy va nodavlat oliy ta’lim muassasalari to‘g‘ridan to‘g‘ri ishtiroki ta’minlandi va tadbir davomida ular tomonidan 30 ming tupdan ortiq manzarali, mevali daraxt va buta ko‘chatlarini ekib, “Ziyolilar bog‘lari” tashkil etildi.

Va brifingimiz nihoyasida 2024-yilning 25-dekabridan 2025-yilning 7-yanvariga qadar respublikamizning barcha oliy va kasbiy ta’lim muassasalarida ta’til e’lon qilinganini eslatib o‘tamiz. Shu o‘rinda 2024-yil 15-dekabrdan 2025-yil 12-yanvarga qadar bir qator yo‘nalishlarda qo‘shimcha poyezd qatnovlari tashkil etilganini va talabalarning so‘rovlariga ko‘ra shaharlararo qo‘shimcha avtobuslar qatnovi tashkil etilishini ma’lum qilamiz.