Tadbirda Sport vaziri Adham Ikromov hamda Oliy ta’lim, fan va innovatsiyalar vaziri o‘rinbosari Sarvarxon Buzrukxonov, vazirlik, idoralar va oliy ta’lim muassasalaridan mas’ullar, talabalar ishtirok etdi.

Yig‘ilganlar talabalarni sportda sinovlarini topshirishda erishgan natijalari bilan qizg‘in qutlab, keyingi yillarda davlat rahbari tomonidan yurtimizda sog‘lom va barkamol avlodni tarbiyalash, aholi o‘rtasida sportni yanada ommalashtirish masalalariga davlat siyosati darajasida e’tibor qaratilib kelinayotganligini alohida ta’kidlab o‘tishdi.

Tadbir davomida sport sinovlarida g‘olib va sovrindor bo‘lgan talabalar “Jismoniy tayyorgarlik darajasi” ko‘krak nishoni bilan taqdirlandi. Shuningdek, sport sinovlariga talabalarni keng jalb qilish hamda ushbu tadbirlarni yuqori saviyada tashkil etishda faollik ko‘rsatgan oliy ta’lim muassasalarining bir guruh rahbar va pedagog kadrlari ham munosib e’tirof etildi.

Qoraqalpoq davlat universiteti rektori Ahmed Reymov, Farg‘ona davlat universiteti rektori Bahodirjon Shermuhammadov, Buxoro davlat universiteti rektori Obidjon Hamidov, Jizzax davlat pedagogika universiteti rektori Shavkat Sharipov, Navoiy davlat pedagogika instituti prorektori Xurshid Qurbonovlarga “Jismoniy tarbiya va sport a’lochisi” ko‘krak nishoni topshirildi.

 Mukofotlarni egalariga Sport vaziri hamda Oliy ta’lim, fan va innovatsiyalar vaziri o‘rinbosari tantanali tarzda topshirib, oliy ta’lim muassasalarining rahbar va pedagog kadrlariga yurtimizda sportni yanada ommalashtirish ishiga qo‘shayotgan fidokorona xizmatlari uchun alohida minnatdorchilik bildirdilar.

Qayd etish joizki, bugungi kunga qadar qadar respublikamizdagi 187 ta oliy ta’lim muassasasining sport sinovlarini topshirish istagini bildirib, “Sport sinovlari” axborot tizimidan ro‘yxatdan o‘tgan talabalarning 129 ming nafaridan ixtiyoriy va 12 ming nafaridan maxsus sport sinovlari qabul qilindi. Sport sinovlarini topshirib, natija qayd etgan talabalar esa 128 ming nafarni tashkil etdi.

Xususan, joriy yilda Qoraqalpoq davlat universitetida o‘tkazilgan sport sinovlarida 11 ming nafar talaba, Farg‘ona davlat universitetida 8 ming, Buxoro davlat universiteti va Navoiy davlat pedagogika institutida 6 ming nafardan hamda Jizzax davlat pedagogika universitetida 5 ming nafar talaba jalb etildi.

Ma’lumot o‘rnida aytish joizki, ixtiyoriy talablar bo‘yicha I, II va III darajalarni 111 ming nafar talabalar qo‘lga kiritgan bo‘lsa, maxsus talablar bo‘yicha I darajani 644 nafar, II darajani 1 591 nafar va III darajani 2 327 nafar talabalar qo‘lga kiritishdi.