Navoiy davlat konchilik va texnologiyalar universiteti negizida “Mahalliylashtirish va innovatsion rivojlantirish markazi” tashkil etildi
2024-11-02 16:20:00 / Vazirlik yangiliklari
Oliy ta’lim, fan va innovatsiyalar vaziri o‘rinbosari Sarvarxon Buzrukxonov Navoiy davlat konchilik va texnologiyalar universiteti negizida tashkil etilgan “Mahalliylashtirish va innovatsion rivojlantirish markazi” faoliyati bilan tanishdi.
Universitetda “Sanoat ishlab chiqarishlarni mahalliylashtirish” kafedrasi ham faoliyat boshlagan bo‘lib, Navoiy mashinasozlik zavodi hududidagi yangi markazda “Dual” ta’lim tizimi asosida kadrlar tayyorlanmoqda hamda olimlar tomonidan ilmiy-tadqiqot ishlari olib borilayapti.
Yirik o‘quv-tajriba kompleksi — “Mahalliylashtirish va innovatsion rivojlantirish markazi”dan o‘quv va amaliy mashg‘ulot xonalari va zamonaviy ilmiy-tadqiqot laboratoriyalari o‘rin olgan. Shvetsariya, Germaniya, Rossiya mamlakatlaridan olib kelingan so‘nggi avlod laboratoriya qurilmalari yordamida universitet talabalari va olimlar import o‘rnini bosuvchi detallarni loyihalash, metallarning fizik-mexanik va kimyoviy tarkibini aniqlash kabi vazifalarni bajarmoqda.
S.Buzrukxonov markaz faoliyati bilan tanisharkan, bu yerdagi zamonaviy laboratoriya jihozlaridan samarali foydalanish zarurligi va innovatsion yondashuvlar asosidagi ilmiy-tadqiqot faoliyatini yanada kengaytirish bo‘yicha tavsiyalar berdi.