Xususan, Toshkent viloyatida “Ovjazsoy – Moviy togʻlar”, “Piskom” hamda Fargʻona viloyatida “Fargʻona” milliy tabiat bogʻlari 188,8 ming gektarda tashkil etildi. Shu bilan birga, Namangan viloyatidagi “Pop” milliy tabiat bogʻi 10 ming gektardan 135,3 ming gektarga yetkazildi.

Ma’lumot uchun, soʻnggi yillarda tabiiy resurslardan oqilona foydalanish, ekotizimlarni asrash hamda muhofaza etiladigan tabiiy hududlarni kengaytirish va rivojlantirish boʻyicha salmoqli islohotlar amalga oshirilmoqda. Xususan, 2025–2026-yillar davomida 10 ta muhofaza etiladigan tabiiy hududning yer maydoni kengaytirildi. Natijada ushbu hududlardagi noyob turdagi oʻsimlik va hayvonot dunyosi toʻliq muhofazaga olindi.

Ta’kidlash joizki, ushbu hududlarni tashkil etish va kengaytirish orqali Piskom va Qurama togʻ tizmalaridа 27 turdagi noyob, 7 turdagi endemik hayvonlar, Oʻzbekiston Qizil kitobiga kiritilgan 40 turdagi oʻsimliklar hamda Fargʻona vodiysida yoʻqolib ketish xavfi ostidagi 24 turdagi hayvonlar va tabiat yodgorliklari saqlab qolinadi.

Shuningdek, METH departamenti tizimidagi muhofaza hududlari soni 24 tadan 27 taga koʻpaydi, joriy yilning 30-mart holatiga koʻra, ushbu muhofaza etiladigan tabiiy hududlarning umumiy maydoni Oʻzbekiston Respublikasi hududining 15,9 foiziga yetkazildi.

Bundan tashqari, 2025-yilda Oʻzbekiston Respublikasi Prezidentining tegishli qaroriga muvofiq joriy yilning 1-iyulidan boshlab muhofaza etiladigan tabiiy hududlar xodimlarining lavozim maoshi 3 baravargacha oshiriladi. Bundan tashqari, METHlarning boshqaruv va soha xodimlariga maxsus unvon va farqlash belgilarini berish tartibi joriy qilindi.

Birgina 2025-yilning oʻzida METHlar faoliyatini samarali tashkil etish va qoʻriqlash ishlarini kuchaytirish maqsadida 400 dan ortiq jihozlar va maxsus anjomlar topshirildi. Shu bilan birga 2026-yilda “Biomerоs” umummilliy loyihasi doirasida muhofaza etiladigan tabiiy hududlarning moddiy-texnik bazasi mustahkamlanishi belgilangan.

Muhofaza etiladigan tabiiy hududlarda qoʻriqlash ishlarining kuchaytirilishi, biotexnik tadbirlarning samarali amalga oshirilishi natijasida minglab noyob turdagi hayvonlarning soni sezilarli darajada oshganligi qayd etildi.