MUROJAAT Dehqonobod tumani Favqulodda vaziyatlar bo‘limi boshlig‘i, podpolkovnik Azizov Husniddin Choriyevichning tuman aholisiga murojaati
2026-09-04 14:10:00 / Rahbariyatning bayonotlari va nutqlari
Assalomu alaykum, hurmatli Dehqonobod tumani aholisi!
Barchamizga ma’lumki, kuz faslining boshlanishi bilan havo harorati asta-sekin pasayib, aholi xonadonlari, ijtimoiy soha obyektlari hamda iqtisodiyot tarmoqlarida isitish vositalaridan foydalanishga bo‘lgan ehtiyoj ortadi. Shu bilan birga, Favqulodda vaziyatlar organlari uchun yong‘in xavfsizligi nuqtayi nazaridan alohida e’tibor va hushyorlikni talab etadigan mavsum boshlanadi.
Statistik ma’lumotlarga ko‘ra, aynan ushbu davrda respublikamizda, shu jumladan Qashqadaryo viloyatida ham yong‘inlar, gaz-havo aralashmasining chaqnashi, fuqarolarning tabiiy va is gazidan zaharlanishi bilan bog‘liq baxtsiz hodisalar soni ortishi kuzatiladi.
Dehqonobod tumani hududida joriy yilning 1-sentyabr holatiga jami 27 ta yong‘in sodir bo‘lgan bo‘lib, shundan 18 tasi aholi xonadonlarida yuzaga kelgan. Mazkur yong‘inlarning birida fuqaro jarohatlangan.
Tahlillar shuni ko‘rsatmoqdaki, yong‘inlarning asosiy kelib chiqish sabablaridan biri elektr uskunalaridan foydalanish va ularning texnik holatiga qo‘yiladigan talablarga rioya qilmaslik, shuningdek, isitish pechlaridan noto‘g‘ri foydalanish, ochiq olovdan ehtiyotsizlik bilan foydalanish hamda bolalarning nazoratsiz qolishi bilan bog‘liq.
Shu munosabat bilan 1-sentyabrdan 30-sentyabrgacha respublika bo‘ylab “Yong‘indan ogohlik” oyligi e’lon qilingan.
Mazkur oylik doirasida tuman hududida yong‘inlarning oldini olish, aholi va obyektlarda yong‘in xavfsizligi talablariga rioya etilishini ta’minlash hamda fuqarolarning favqulodda vaziyatlarda to‘g‘ri harakat qilish ko‘nikmalarini oshirishga qaratilgan profilaktik tadbirlar amalga oshirilmoqda.
Jumladan:
- ijtimoiy soha obyektlari, tadbirkorlik subyektlari ishchi-xodimlari hamda mahallalarda aholi bilan yong‘inlarning oldini olish va yong‘in sodir bo‘lgan taqdirda to‘g‘ri harakat qilish bo‘yicha tushuntirish ishlari olib borilib, amaliy mashg‘ulotlar o‘tkaziladi;
- Ichki ishlar organlari, mahalla va Ijtimoiy himoya agentligi bilan hamkorlikda qarovchisi yo‘q, yolg‘iz yashovchi keksalar, shuningdek, spirtli ichimliklarga ruju qo‘ygan fuqarolar istiqomat qiladigan xonadonlar o‘rganilib, ularga zarur tushuntirish va tavsiyalar beriladi;
- tunda odamlar qoladigan maskanlar, jumladan, mehribonlik, saxovat va muruvvat uylari, talabalar yotoqxonalari va ijara uylari, shuningdek, qurilish obyektlaridagi ishchilar yotoqxonalarida xavfsiz sharoit ta’minlanganligi yuzasidan nazorat kuchaytiriladi;
- odamlar ommaviy to‘planadigan maskanlar, xususan, bozorlar, yirik savdo va ko‘ngilochar majmualar, avtoshohbekatlarda tegishli xizmatlar bilan hamkorlikda amaliy maxsus-taktik o‘quv mashg‘ulotlari o‘tkaziladi.
Fursatdan foydalanib, barcha tashkilot va idoralarda, jamoat maskanlarida, shuningdek, aholi xonadonlarida mazkur oylikni ko‘tarinki ruhda va samarali o‘tkazish — Sizni, jamoangizni, yaqinlaringizni va mol-mulkingizni yong‘in va chaqnash xavfidan, shuningdek, butun oilaga qayg‘uli fojia olib kelishi mumkin bo‘lgan is gazidan zaharlanishdan asrashga qaratilganini unutmaslikka chaqiraman.
Aziz yurtdoshlar!
Zero, shunday ekan, keling, ushbu yo‘lda birlashgan holda, o‘tkazilayotgan oylik doirasida:
- bog‘chalarda bolajonlarimizga “Gugurt o‘yinchoq emas!”, “bolalar sho‘xligi”ning ayanchli oqibatlarini tushuntiraylik;
- boshlang‘ich sinf o‘quvchilariga “Olov ham do‘st, ham dushman” ekanligini anglataylik;
- o‘rta va yuqori sinf o‘quvchilariga yong‘in o‘chirish vositalaridan foydalanish hamda yong‘in sodir bo‘lganda to‘g‘ri harakat qilishni o‘rgataylik;
- korxona, tashkilot va muassasalarda ishchi-xodimlarga yong‘in xavfsizligi qoidalarini yana bir bor eslataylik;
- barcha maskanlarimiz va qadrdon uyimizda yong‘in kelib chiqishiga sabab bo‘lishi mumkin bo‘lgan manbalarni bartaraf etaylik.
Shuningdek, xonadon va obyektlarimizda quyidagilarga alohida e’tibor qarataylik:
- gaz va elektr tarmoqlari hamda asbob-uskunalarining sozligini;
- isitish pechlari va mo‘rilarining mavsumga tayyorligini;
- maishiy gaz ballonlarining hayotimiz uchun xavfsiz joylashtirilganligini;
- tez yonuvchan materiallar va xas-xashaklarning yong‘in kelib chiqishiga sabab bo‘lmasligini;
- evakuatsiya yo‘llarining ochiq va to‘sqinliksiz holatda bo‘lishini;
- o‘zimiz va atrofimizdagi insonlarning yong‘in xavfsizligi bo‘yicha yetarli bilim va ko‘nikmaga ega ekanligini nazorat qilaylik.
Hurmatli Dehqonobod tumani aholisi!
Yong‘in xavfsizligini ta’minlash — faqat mutasaddi tashkilotlarning emas, balki har birimizning kundalik mas’uliyatimizdir.
Shu sababli, “Yong‘indan ogohlik” oyligi doirasida o‘tkaziladigan tadbirlarda faol ishtirok eting!
Mutasaddi tashkilotlar tomonidan berilayotgan tavsiya va ko‘rsatmalarga qat’iy rioya qiling. O‘zingizning, yaqinlaringizning hayoti va sog‘lig‘i hamda mol-mulkingiz xavfsizligiga befarq bo‘lmang!
E’tiboringiz uchun rahmat!
Dehqonobod tumani Favqulodda vaziyatlar bo‘limi boshlig‘i,
podpolkovnik Azizov Husniddin Choriyevich