Qashqadaryo viloyati Dehqonobod tumani hokimligi

Dehqonobodda yoshlar salomatligini asrash va narkojinoyatchilikning oldini olishga qaratilgan targ‘ibot uchrashuvi o‘tkazildi

Dehqonobod tumani 1-son texnikumida yoshlar salomatligini asrash, ularni giyohvandlik vositalari va psixotrop moddalarning salbiy ta’siridan himoya qilish hamda narkojinoyatchilikning oldini olishga qaratilgan targ‘ibot uchrashuvi tashkil etildi.

Tadbirda Jinoyat ishlari bo‘yicha Dehqonobod tumani sudining tergov sudyasi N. Ishmuradov ishtirok etib, O‘zbekiston Respublikasining 2026 yil 11 iyundagi O‘RQ–1151-sonli Qonunining mazmun-mohiyati yuzasidan o‘quvchi-yoshlarga batafsil tushuntirishlar berdi.

Uchrashuv davomida mazkur qonun bilan giyohvandlik vositalari, psixotrop moddalar, ularning analoglari hamda kuchli ta’sir qiluvchi moddalar bilan qonunga xilof ravishda muomala qilganlik uchun javobgarlik yanada kuchaytirilgani, bunday jinoyatlarning jamiyat va inson salomatligiga salbiy ta’siri haqida atroflicha so‘z yuritildi.

Shuningdek, o‘quvchi-yoshlar o‘rtasida kuchli ta’sir qiluvchi dori vositalari va boshqa zaharli moddalarning noqonuniy tarqalishiga qarshi hamjihatlikda kurashish, ta’lim muassasalarida ogohlik va hushyorlikni kuchaytirish, yoshlarni zararli illatlardan asrash har birimizning muhim vazifamiz ekani alohida ta’kidlandi.

Ta’kidlanganidek, bunday ma’naviy-ma’rifiy uchrashuvlar yoshlarning huquqiy ongi va madaniyatini yuksaltirish, ularni sog‘lom turmush tarziga yo‘naltirish hamda narkojinoyatchilikning barvaqt oldini olishda muhim ahamiyat kasb etadi.

Kanalga ulanish:
@Dehqonobodpress