⚡️13 yoshli dehqonobodlik o‘quvchi matematikadan A+, ingliz tilidan B2 darajasini qo‘lga kiritdi
2026-06-05 10:30:00 / Yangiliklar
Dehqonobod tumanining yosh avlodi ilm-fan va ta’lim sohasida yangi yutuqlarga erishishda davom etmoqda. Ana shunday quvonarli natijalardan biri tumandoshimiz, 13 yoshli Barotov Sunnatullo nomi bilan bog‘liq.
Yosh o‘quvchi matematika fanidan A+ darajadagi natijani qayd etib, ingliz tilidan B2 darajasidagi sertifikatni qo‘lga kiritdi. Bu esa uning o‘z ustida muntazam ishlashi, bilim olishga bo‘lgan qiziqishi va intilishining yorqin samarasidir.
Mutaxassislar tomonidan ingliz tilidan B2 darajasi tilni mustaqil va erkin qo‘llay olish ko‘rsatkichlaridan biri sifatida e’tirof etiladi. Bunday natijaga 13 yoshda erishish esa alohida tahsinga loyiq yutuq hisoblanadi. Matematika fanidan A+ darajasidagi natija ham o‘quvchining yuqori bilim va salohiyatini yaqqol namoyon etadi.
Shubhasiz, ushbu muvaffaqiyat zamirida Sunnatulloning tirishqoqligi, ustozlarining fidokorona mehnati hamda ota-onasining farzand ta’lim-tarbiyasiga bo‘lgan yuksak e’tibori mujassam.
Dehqonobod tumani hokimligi Barotov Sunnatullo, uning ota-onasi va ustozlarini ushbu yutuq bilan samimiy tabriklaydi hamda yosh bilimdonga kelgusida yanada yuksak marralarni zabt etishni tilaydi.
Yoshlarimizning ilm yo‘lidagi muvaffaqiyatlari tumanimiz va yurtimiz taraqqiyotiga munosib hissa bo‘lib qo‘shilaversin.
Kanalga ulanish:
@Dehqonobodpress