Oqmachit mahallasida tashabbus va birdamlik samarasi: muhim yo‘l infratuzilmasi yangilanmoqda
2026-04-22 15:10:00 / Yangiliklar
Oqmachit mahallasida tashabbus va birdamlik samarasi: muhim yo‘l infratuzilmasi yangilanmoqda
Dehqonobod tumanida “Tashabbusli byudjet” loyihasi doirasida aholi faolligi va hamjihatligi natijasida yana bir muhim infratuzilma tashabbusi hayotga izchil tatbiq etilmoqda.
2025-yil “Tashabbusli byudjet” loyihasining 2-mavsumi doirasida Oqmachit mahallasidan ilgari surilgan tashabbus 5265 ta ovoz bilan g‘olib deb topildi. Mazkur natija fuqarolarning hududdagi dolzarb muammolarni hal etishga bo‘lgan faol ishtiroki va yuksak fuqarolik mas’uliyatining yaqqol ifodasidir.
Loyiha doirasida Oqmachit mahallasiga qarashli Qoluvdor va Oqmachit qishloqlaridagi umumiy uzunligi 3045 metr bo‘lgan yo‘l qismida asfalt qoplamasi yotqizish ishlari amalga oshirilmoqda. Ayni kunlarda qurilish ishlari belgilangan me’yor va talablar asosida jadal sur’atlarda olib borilmoqda.
Mazkur yo‘lning ta’mirlanishi hudud aholisi uchun muhim qulayliklar yaratib, ichki qatnovni sezilarli darajada yengillashtiradi. Shuningdek, transport harakati xavfsizligini oshirish, vaqt va resurs tejalishini ta’minlash hamda mahalla infratuzilmasini yanada rivojlantirishga xizmat qiladi.
Eng muhimi, ushbu loyiha “Tashabbusli byudjet” dasturining amaliy samarasi sifatida fuqarolarning o‘z tashabbuslari orqali hudud ravnaqiga munosib hissa qo‘shayotganini yana bir bor namoyon etmoqda. Oqmachit mahallasi aholisi esa amalga oshirilayotgan bunyodkorlik ishlaridan mamnun bo‘lib, yangi va ravon yo‘lning yaqin kunlarda foydalanishga topshirilishini intiqlik bilan kutmoqda.
Kanalga ulanish:
@Dehqonobodpress