Qashqadaryo viloyati Dehqonobod tumani hokimligi

Dehqonobod tumani hokimi Sherzod Shokirov Chuchuquduq mahallasida bo‘lib, mahalla fuqarolar yig‘ini binosida Chuchuquduq, Yangiobod va Beshbuloq mahallalarining “yettilik” vakillari bilan ochiq muloqot o‘tkazdi. Uchrashuv davomida mahalla yettiligi faoliyati yuzasidan o‘rganish ishlari olib borilib, mahallalar kesimida mavjud muammolar atroflicha muhokama qilindi. Natijada bir qator tuman miqyosidagi masalalar o‘z yechimini topdi. Xususan, bir guruh fuqarolarning tomorqa yerlarini sug‘orish uchun suvni saqlash va maqsadli foydalanish imkoniyatlarini yaxshilash maqsadida tuman qurilish bo‘limi balansida bo‘lgan beton lotoklar mahalladagi ehtiyojmand fuqarolarga yetkazib berildi. Shuningdek, Yagona reyestrda ro‘yxatda turgan bir guruh fuqarolarni qo‘llab-quvvatlash maqsadida subsidiya va ssuda ajratish masalalari yuzasidan tuman hokimi tomonidan tegishli topshiriqlar berildi. Muloqot jarayonida mahallalarda ijro-intizom holati, “Yashil makon” umummilliy loyihasi doirasida amalga oshirilayotgan ishlar hamda soliq tushumlari bilan bog‘liq kamchiliklar tanqidiy ko‘rib chiqildi va ularni bartaraf etish yuzasidan aniq vazifalar belgilandi. Bundan tashqari, jazoni ijro etish muassasasidan qaytgan fuqaroni ijtimoiy qo‘llab-quvvatlash, unga ko‘mak mablag‘lari ajratish hamda tadbirkorlik faoliyatini boshlashi uchun zarur sharoitlar yaratish masalalari yuzasidan ham mas’ullarga topshiriqlar berildi. Yig‘ilish yakunida belgilangan vazifalar ijrosini ta’minlash, mahallalar faoliyatini yanada samarali tashkil etish hamda aholi bilan ishlash sifatini oshirish bo‘yicha aniq ko‘rsatmalar berildi.